Aıtysker aqyn Balǵynbek Imashev Astananyń atyn ózgertýge qatysty óz pikirin bildirip, bul bastamany qoldamaıtynyn aıtty.

Bul týraly ol óziniń Instagram paraqshasynda jarıalady.

"Elimizdiń kóshin kemeldikpen, danalyqpen ilgeri bastap kele jatqan elbasymyzǵa qaı shahardyń atyn bersek te jarasady. Biraq, óz basym qalaǵa adamnyń atyn berýdi quptamaımyn. Ásirese, kózi tirisinde. Tarıxta qanshama ulyq tulǵalar kerisinshe týǵan qalasynyń atyn alǵan (Farabı, Tarazı, Buxarı, Basrı t.b). Keńestik kezeńde Áýlıeata qalasynyń ataýyn Jambylǵa ózgertkende, jaryqtyq Jambyl Jákem qatty qapa bolǵan eken. Eldi-mekenniń atyn ózgertýge qyrýar qarjy ketetini belgili. Daǵdaryspen jaǵalasyp, EXPO-men qabattasyp jol ortada atymyzdy, qonalqada ataýymyzdy ózgerteıik degenimiz qaı sasqanymyz? Bul máseleni kótere berý jaǵympazdyqtan góri qastandyqqa kóbirek uqsaıdy. Nardyń júgin arqalaǵan Nursultan aǵamyzǵa qartaıǵan shaǵynda jany ashyp, abyroıyn qorǵaıtyn adam qalmaǵan ba dep qalasyń. Táýelsizdiktiń 25 jyldyǵyna mindetti túrde bir qalaǵa elbasynyń atyn berý kerek bolsa, onda Petropavlǵa ne Pavlodarǵa bersin. Sebebi, sol qalanyń atyn ózgertýge 25 jyl boıy shamamyz kelmeı, sonda qonystanǵan qalyń orystardan (bálkı, kórshi Reseıden) ımenip kelemiz ǵoı. Eger eki qalanyń birine elbasynyń atyn bersek, ondaǵylar  "qyńq" ete qalmaı qalady. Elbasynyń abyroıyn el aldynda túsire bergenshe, Ult kóseminiń abyroı-bedelin ulttyń rýxyn kóterýge, memlekettiń mańyzdy máselelerin sheshýge jumsamaımyz ba?", - dep jazdy Balǵynbek Imashev.

Aıta ketsek, Astanaǵa Nazarbaevtyń atyn berý týraly depýtat Qýanysh Sultanov jasaǵan usynys kópshilik arasynda qyzý talqylanýdy.  Bekbolat Tileýhan bastaǵan májilis depýtattary bul usynysty qoldap otyr. Elbasynyń ózi de osyǵan qatysty pikirin aıtqan bolatyn.