Bul týraly búgin Saıram aýdanynyń ákimi Samat Saparbaev OQO Aımaqtyq komýnıkasıalar qyzmetinde ótken brıfıńte habarlady. Aıtýynsha, aýdanda egemendik alǵan jyldary jalpy óńirlik ónim 3,8 mlrd. teńgeden 90,3 mlrd. teńgege ósip, jan basyna shaqqanda 449,3 myń teńgege jetken. Óńirdiń ekonomıkalyq damýyn anyqtaıtyn basty sala – ónerkásip salasy desek, 1991 jyly aýdannyń ónerkásip kásiporyndary 224,8 mln. teńgeniń ónimin óndirse, 2015 jyly bul kólem 18194,0 mln. teńgege jetip, kórsetkish 8,1 esege artqanyn kórsetip otyr.
«Egemendik jyldarynda aýdanda iri qara mal sany 1991 jyly 61 myńnan assa, 2016 jyly 151 myńnan astam basqa jetip, 2,4 esege ósti. Qoı-eshki sany 65 myń bastan 99 myń basqa jetip, 150 %-dy qurady. Jylqy 6500 bastan 37 myń basqa jetip, 574 %-dy qurady. Et ónimi 1991 jylǵy 6880 tonnadan 21000 tonnaǵa jetip, 3 esege ósti. Sút ónimi 1991 jyly – 40684 tonna bolsa, 2016 jyly -160 myń tonnaǵa jetip, 2,8 esege ósti. Jumyrtqa 1991 jyly – 98500 bolsa, 2016 jyly – 142 myń danaǵa jetip, 1,4 esege ósti. Jún 197 tonnadan 224 tonnaǵa, nemese 137 %-ǵa ósti», — dedi S.Saparbaev.
Baspasóz jıynynda ózge de salalardaǵy jetistikterge toqtalǵan aýdan basshysy týrızm salasy boıynsha Saıramda egemendik alǵanǵa deıin jumys istelmegenin alǵa tartyp, osynaý táýelsizdik jyldarynda salaǵa erekshe kóńil bólý arqasynda aýdannyń tabysty bıznes túriniń birine aınalǵanyn jetkizdi. Atap aıtqanda, búgingi tańda Saıramdaǵy Abylaı han at basyn tiregen Hanqorǵan tóbesi, Sıqym baba, Janys baba keseneleri de halyq ıgiligi úshin jumys jasaýda eken. Saıram aýdany qalaǵa jaqyn ornalasqandyqtan Aqsý, Mashat, Arys ózenderi men Kólkent jáne Qyryqkól dep atalatyn kólder boıynda demalys nysandary kóptep boı kóterip, kelýshilerdiń sany da jyl sanap artyp kele jatqany baıandaldy.
Tilshilermen bolǵan kezdesýde Samat Aıdarhanuly kúndelikti halyqqa qajetti tamaq ónimderiniń 20 túriniń 18-i, ıaǵnı, qant pen tazartylǵan kúrishten basqa ónimderdiń barlyǵy Saıramda óndiriletinin maqtan etti. Barlyq salalar boıynsha damý kórsetkishteri jaqsaryp kele jatqan aýdanda tamaq ónimderiniń 11 túri aýdanda artyǵymen óndiriletinin alǵa tartty.
Sondaı-aq, óz sózinde komýnaldyq, áleýmettik, sáýlet, qurylys, bilim, mádenıet, sport salalary syndy ózge de baǵyttaǵy jetistikterdi jetkizgen aýdan ákimi bul baǵyttaǵy jumystardyń odan ári jalǵasatynyn jetkizdi.
http://adym.kz/
