«Qamshy» portaly mal saýdasymen aınalysqan aǵaıyndy úsh jigittiń ólimine qatysty Uzynaǵash aýylynda bolǵan qylmystyq isti jiti baqylap, oqyrmandaryn aqparattandyryp keledi. Jaqynda ǵana, atalǵan qylmysqa qatysty tergeý isi aıaqtalyp, qylmysqa qatysty úshinshi kúdikti bar ekeni belgili bolǵan edi.

Uzynaǵashtaǵy úsh aǵaıynynyń ólimine qatysty aıyptalǵandar qataryna Súleımenovtiń áıeli de kirýi  múmkin. Qarasaı aýdanynda ótip jatqan sot prosesinde prokýror osyndaı jaıttyń basyn ashty. Bul týraly 31 arna habarlady. 

Tekserý barysynda istegi basty aıyptalýshy Súleımenovtiń úıinen aǵaıyndardy óltirgen myltyqtan basqa, taǵy bir qarýdyń saqtalǵany anyqtalǵan.

Prokýror úıde qarýdyń bar ekenin bile tura qylmystyń aldyn almaǵan onyń áıeliniń de oqıǵaǵa qatysy bar dedi.

Eske sala ketetin bolsaq, atalǵan oqıǵaǵa baılanysty tergeý aıaqtalyp sot bastalar aldynda jábirlenýshilerdiń týystary «Qamshy» portalyna tergeý jumystarynda shıkiliktiń bar ekenin aıtqan bolatyn.

«Talǵattyń áıeli bolsa qarý-jaraqty jasyrǵan eken. Ol jaýabynda: «18-i kúıeýim úıde boldy» degen. Al, Talǵa úıde bolsa bizdiń baýyrlarymyzdy kim óltirdi?», degen edi jábirlenýshi týystarynyń biri Adal Zarlyhan. Aıta keter bolsaq, Talǵat Súleımenov tergeýge bergen jaýabynda aǵaıyndar joǵalǵan 18 qyrkúıekte úıde bolmaǵanyn aıtqan. Osyndaı kúdikti jaǵdaılardan jábirlenýshilerdiń týystary marqumdardy óltirgen qylmystyń artynda basqa syr bar dep keledi. Olar bılikten qylmysty tolyq ashyp, qylmyskerlerdiń tıisti jazasyn berýdi surap otyr. 

Oqyrmannyń esine salsaq, 18 qyrkúıekte Almaty oblysy Jambyl aýdanynda joǵalǵan úsh azamattyń qylmyskerler qolynan qaza tapqany, osy qylmysqa qatysty kúdikti retinde 24 qyrkúıekte eki azamattyń ustalǵany habarlanǵan bolatyn. Atalǵan úsh azamat, 1979 jylǵy Doldanuly Jarqynbek, 1973 jylǵy Zarlyhanuly Muqıat pen Álimhan Qadylbek esimdi jigitter Shyǵys Qazaqstan oblysynyń Tarbaǵataı aýdanynan 40 bas mal satyp alyp, ony eki júk kóligimen 17 qyrkúıek, senbi kúni, Almaty mańyndaǵy Uzynaǵash bazaryna shyǵarǵan.

Erlan Tóleýbaı