Ońtústik Qazaqstan oblysynda 2016 jyldyń 9 aıynda ónerkásip salasynda 574,2 mlrd. teńgeniń ónimi óndirildi.

          Baspasóz málimetterine qaraǵanda, ótken jyldyń tıisti kezeńimen salystyrǵanda naqty ındeks kólemi 104,9 paıyzǵa artty. Ónerkásiptiń ishindegi taý-ken óndirisinde 171,6 mlrd. teńgeniń ónimi shyǵaryldy. Jalpy, ónerkásiptegi úles salmaǵy 61,2 paıyzǵa teń óńdeý salasynda óndirilgen ónim kólemi 351,7 mlrd. teńgege jetti. Asa mańyzdy ónimderdiń ishinde 22 092,1 myń sharshy metr maqta matalary, 13306 tonna maqta talshyǵy, 3748 myń tonna munaı ónimderi, 1 946,8 myń tonna portlandsement jáne 779 mln. kVt/saǵ. elektr qýaty óndirildi. Ońtústik ekonomıkasyn quraýshy basty sala aýyl sharýashylyǵy desek, bul salada 319,6 mlrd. teńgeniń ónimi óndirildi. Agrarly óńirde aýyl sharýashylyǵy óndirisi de jyldan-jylǵa artyp keledi. Ótken jylǵy jáne bıylǵy 9 aılyq kórsetkishterdi salystyrǵanda, alynǵan ónim kólemi 0,7 paıyzǵa ósken. Qańtar-qyrkúıek aralyǵynda tirideı salmaqta 146,3 myń tonna et, 565 myń tonna sút, 232,3 mln. dana jumyrtqa óndirildi. Bul ónimderdiń bıylǵy kólemi byltyrǵymen eseptegende anaǵurlym kóp. Tórt túlik te jyl sanap ósip keledi. 2016 jyldyń 1 qazanyndaǵy málimetke súıensek, óńirde 897,5 myń iri qara, 3895,3 myń qoı, 314,6 myń eshki, 243,9 myń jylqy, 24,1 myń túıe jáne 2637,6 myń úı qusy bar.

 Táýelsizdikten keıingi alǵashqy kezeńderde aýyl sharýashylyǵynyń ishinde egin sharýashylyǵynyń úlesi basym bolatyn. Iaǵnı óńirde mal ónimderiniń óndirisi kúrt azaıyp ketti. Búginde jaǵdaı birshama turaqtaldy. Mal sharýashylyǵyn damytýǵa baǵyttalǵan júıeli jumystardyń nátıjesinde bul salada ilgerileýshilik paıda boldy. Qazirgi tańda egin men mal sharýashylyǵynyń araqatynasy onsha alys emes. Máselen, 2016 jyldyń 9 aıynda dıqandar tapqan tabys 168,6 mlrd. teńgeni qurasa, mal baqqan sharýalar 150,3 mlrd. teńge paıda túsirdi.

http://www.inform.kz/