Táýelsizdik jyldarynda elde agroónerkásiptik kesheni salasyn damytýǵa aıryqsha basymdyq berildi. Bul rette, QR Prezıdenti N. Nazarbaev «Qazaqstan-2050» Strategıasy qalyptasqan memlekettiń jańa saıası baǵyty» atty Qazaqstan halqyna arnaǵan Joldaýynda azyq-túlik qaýipsizdigine tónetin qaterdi jahandyq syn-qaterler qataryna jatqyzǵan bolatyn. Iaǵnı, álemde halyq sany ósýiminiń joǵary qarqyny azyq-túlik tapshylyǵy máselesin týyndatýda. 
Bul qatarda, memlekettik 2013-2020 jyldarǵa arnalǵan agroónerkásip keshenin damytýdyń salaaralyq «Agrobıznes-2020» baǵdarlamasy Shymkent qalasynda aýyl sharýashylyǵy ónimderiniń kólemin arttyrýǵa aıtarlyqtaı múmkindik berýde.
– Qazirgi kezde álem elderinde ekonomıkalyq belsendi halyqtyń 45 paıyzy aýyl sharýashylyǵymen aınalysady. Bul baǵytta, memlekettik aýqymda qoldaý kórsetilip otyrǵan «Agrobıznes-2020» baǵdarlamasynyń nátıjesinde, agroónerkásiptik keshendegi sýbektiler sanyn 4,5 esege kóbeıtý kózdelgen. Bul qujattyń basqa baǵdarlamalarǵa qaraǵanda ereksheligi óte zor. Iaǵnı, aldymyzda qaladaǵy agroónerkásiptik keshen sýbektileriniń básekege qabilettiligin arttyrý mindeti tur, – deıdi qalalyq aýyl sharýashylyǵy jáne veterınarıa bóliminiń basshysy Ǵanı Qurmanbaı. 
Jalpy, Shymkent qalasyndaǵy aýyl sharýashylyǵy maqsatyndaǵy jer kólemi 62 219 gektardy quraıdy. Iaǵnı, bul kórsetkish qala aýmaǵynyń 54 paıyzyn ıelenedi. Nesibesin jerden tergen 4152 aýyl sharýashylyǵy taýar óndirýshileri tirkelgen. Jyl boıy atqarylǵan aýqymdy jumystardyń nátıjesinde, jınap alynǵan ónimniń kólemi 16 mıllıard 543 mıllıon teńgeni qurady.
Aýyl sharýashylyǵy salasyn túletýde klımaty qolaıly ári jer qunarlylyǵy joǵary Shymkent qalasy búginde el aýmaǵyndaǵy jylyjaılardyń otanyna balanady. Oǵan jyl saıyn ónim kólemi ulǵaıa túsken aýyl sharýashylyǵy keshenderiniń nátıjesi de basty sebep bolýda. Iaǵnı, jylyjaılardyń jalpy kólemi 123 gektarǵa ulǵaıdy. Jınap alynǵan ónimderdi saqtaý jáne jyl boıy tutynýshylarǵa qajetinshe jetkizý maqsatynda syıymdylyǵy 45 myń tonna bolatyn qoımalar daıyndalǵan.
Oblys ortalyǵynda azyq-túlik beldeýin qalyptastyrý, baǵany turaqtandyrý baǵytynda jasalǵan tyń qadamdar óz qaıtarymyn berip te keledi. Qala turǵyndaryn taza ári arzan kókónispen qamtamasyz etý maqsatynda bıyl paıdalanýǵa berilgen «Asar KZ» sharýa qojalyǵy jylyjaı kesheniniń ónimderi shymkenttik tutynýshylardyń dastarhan mázirin tolyqtyryp úlgerdi. Búginde jylyjaı kesheniniń jalpy kólemi 4,7 gektardy alyp jatyr. Qojalyq basshysy Baqtybek Ábdihalyqov aldaǵy ýaqytta jylyjaı kesheniniń kólemin munan ári de ulǵaıta túspek nıette.

http://shymkala.kz/