Túıe sharýashylyǵy elimizdiń mal sharýashylyǵyndaǵy eń tartymdy baǵyttyń biri bola alady. Qazir memleket 1 lıtr shubat óndirýge 55 teńge sýbsıdıa tóleıdi.Búginde túıe sharýashylyǵymen aınalysatyn qojalyqtarǵa barynsha kómek qajet. Túıeniń etine, sútine memleket tarapynan sýbsıdıa berilse durys bolar edi. Jumysyn bastaǵaly otyrǵan palata osy máselelerdiń sheshimin tabýǵa atsalysady degen úmittemiz. Ǵalymdardyń ózi dáleldep otyr ǵoı túıe sútiniń birneshe aýrýǵa em ekenin. Endeshe aýrýhanalardyń, mektepterdiń, mekemelerdiń mázirine shubatty endirse durys bolady.

               Men Shymkenttegi túıe palatasy ashylǵanyn qoldaımyn. Túıe tuqymynyń taza qandy, asyl tuqymdy maldaryn satý boıynsha aýksıondar (bırjalar), kórmeler men jármeńkeler ótkizýdi uıymdastyrý da palatanyń moınynda. Sondaı-aq, sharýashylyqtarda qajetti ınfraqurylymdy ázirleýge járdemdesý, jarǵylyq maqsattar men mindetterdi júzege asyrý úshin ınvestısıalar men granttar tartý da túıe ósirýshilerge kóp járdem bolary anyq.
Túıe tuqymy men soǵan baılanysty bıznestiń damýyna kómegin tıgizetin shetel uıymdarymen, atap aıtqanda jańa tehnologıalardy engizý, genetıkany jaqsartý, túıe tuqymdaryn taratý jáne baılanystardy nyǵaıtý boıynsha birigip qyzmet isteý, túıe tuqymdaryn ósirý máseleleri boıynsha basqa elderdiń Asosıasıalarymen birigip qyzmet atqarý da nátıjeli bolary anyq.
Túıe tuqymynyń ishki jáne syrtqy naryqtaǵy saýdasynyń damýyna jaǵdaı jasaý da palatanyń aldyna qoıǵan maqsattarynyń biri bolyp tabylady.

Baqtıar Ahaev, «Úsenov N» sharýa qojalyǵynyń tóraǵasy