Búginde tabıǵaty aýyl sharýashylyǵy salasyna qolaıly Túlkibas aýdanynda asyl tuqymdy mal sharýashylyǵyn damytý erekshe qolǵa alynyp, mal basy jyldan jylǵa artyp keledi. Aýdandaǵy árbir sharýashylyq asyl tuqymdy mal basyn arttyrýdy qolǵa alǵan. Óıtkeni asyl tuqymdy maldar etti jáne satýǵa óte yńǵaıly.
Búginde aýdanda asyl tuqymdy úsh myńnan astam iri qara mal, segiz júzge jýyq jylqy bar. Onyń ishinde osydan úsh jyl buryn Avstralıa elinen ákelingen Jabaǵyly aýylyndaǵy angýs jáne gereford asyltuqymdy iri qara maldar jersinip, tóldep mal basy 800-ge jetken. Sonymen qatar Kereıt aýylyndaǵy Reseı, Túrkimenstan, Qyrǵyzstan elinen ákelingen sáıgúlikter respýblıkada ótkizilgen túrli jarystarǵa qatysyp, aýdan mereıin ústem etýde. Qazir onda 180-ge tarta asyl tuqymdy attar bar.
Jalpy aýdanda mal sharýashylyǵyn damytý, maldardy asyldandyrý memlekettik baǵdarlamalary tolyq oryndalyp otyr. Máselen, bir ǵana «Sybaǵa» memlekettik baǵdarlamasy boıynsha bıylǵy jylǵy josparda 100 bas analyq alý belgilengen bolsa, jarty jyldyń ózinde 364 bas analyq, 12 bas buqa satyp alynyp, tapsyrma 3,6 ese oryndaldy. Sonymen qatar «Altyn asyq», «Qulan» baǵdarlamalary aýdanda berilgen mejeden artyǵymen oryndalýda.
Bıyldyń alty aıyndaǵy málimet boıynsha aýdanda shaǵyn jáne orta bızneste tirkelgen kásipkerler sany 7772 birlikti qurady. Shaǵyn jáne orta kásipkerlikte jumys isteıtinderdiń sany 17315 adamǵa jetip, osy salada óndirilgen ónim kólemi 7 mlrd 213 mln teńgeni, búdjetke túsken salyq kólemi 76,8 mln. teńgege jetti.
Pikir qaldyrý