Elimizdiń aýyl sharýashylyǵy salasynda Elbasynyń tapsyrmasymen qolǵa alynǵan birneshe memlekettik baǵdarlamanyń júzege asyp jatqan ámbege aıan. Sonyń biri – asyl tuqymdy iri qarany kóbeıtýdi kózdeıtin «Sybaǵa» baǵdarlamasy. Búginde Úkimet tarapynan «Sybaǵa» baǵdarlamasyna qatysýshylarǵa qoldaý qarjylar kórsetilýde.
Túrkistan qalasy ákimi apparatynyń baspasóz qyzmeti taratqan málimetterge súıensek, Túrkistan aýmaǵynda bıylǵy jyldyń jeti aıynda «Sybaǵa» baǵdarlamasy aıasynda bes myńǵa tarta iri qara satyp alynǵan. Naqtylap aıtsaq, 4993 bas. Bul bul baǵytta berilgen tapsyrmanyń eki jarym esege artyq oryndalǵanyn bildirse kerek. Óıtkeni jospar boıynsha jyl basynan beri tamyz aıyna deıin eki myń bas alynýy tıis bolǵan.
«Sybaǵa» baǵdarlamasynyń maqsaty sharýalar shetelden jáne óz elimizdegi etti baǵyttaǵy asyl tuqymdy buqalardy satyp alyp, seleksıalyq jáne asyl tuqymdyq jumystardy júrgizý, alynǵan tólderdiń buqashyqtaryn arnaıy belgilengen shetelge eksportqa et shyǵarý múmkindigi bar iri mal bordaqylaý alańdaryna ótkizý (satý), al mal bordaqylaý alańdary óz kezeginde satyp alǵan buqashyqtardy bordaqylap, etin shetelderge shyǵarýy tıis. Seleksıalyq jáne iri qara maldy asyldandyrý jumystaryn júrgizýdiń nátıjesinde sharýalardyń analyq maldary 10-12 jylda etti baǵyttaǵy asyl tuqymdy malǵa aınalatyn bolady.
Atap aıtqanda, satyp alý boıynsha: otandyq jáne Eýropa elderinen ımporttalǵan maldyń árbir basyna 154 myń teńge, Avstralıa, AQSH jáne Kanadadan alynǵan asyl tuqymdy malǵa 200 myń teńge sýbsıdıa, al seleksıalyq jáne asyl tuqymdyq jumystardy júrgizgeni úshin árbir bas iri qara mal analyǵyna 18 myń teńge sýbsıdıa beriledi jáne buqashyqtardy belgilengen arnaıy mal bordaqylaý alańdaryna ótkizgeni úshin árbir basyna satý qunynan basqa 24 myń teńge sýbsıdıa beriledi.
Pikir qaldyrý