Sozaq aýdanynda aýyl sharýashylyǵyn damytýdyń «Qulan», «Sybaǵa», «Altyn asyq», «Agrobıznes – 2020» memlekettik bardarlamalarymen qatar oblys ákiminiń bastamasymen qabyldanǵan «2014-2016 jyldarǵa arnalǵan mal sharýashylyǵyn damytý baǵdarlamasy» sheńberinde aýqymdy jumystar atqarylýda. Atalǵan baǵdarlamalar aıasyndaǵy jumystar aýdan sharýalaryn mal bordaqylaýǵa yntalandyryp, keleshekte tabys tabýdyń, qosymsha jumys oryndaryn ashýdyń, birden bir kózine aınalýda. 

Búginde memleket tarapynan berilgen múmkindikterdi durys paıdalanǵan Qaraqur aýyl okrýginde «Qaraqur» óndiristik kooperatıvi túıe jáne qoı sharýashylyǵyn damytýda. Al, Sholaqqorǵan aýyl okrýgindegi «Baǵdat» sharýa qojalyǵy túıe ósirýmen ǵana aınalysady. Qumkent aýyl okrýginen «Qumkent» óndiristik kooperatıvi asyl tuqymdy qoı sharýashylyǵy bolyp tirkelip, jumys jasaýda.

Aýdan ákimi Maqsat Isaevtiń bıylǵy alǵashqy alty aıda atqarylǵan jumystarynyń esebine júginsek, «Sybaǵa» baǵdarlamasy boıynsha 42 bas asyl tuqymdy buqa satyp alynyp, myń eki júzge jýyq sıyr tuqymdyq túrlendirilýge tartylǵan. Al «Altyn asyq» baǵdarlamasy boıynsha jospar alpys toǵyz bas qoshqar satylyp alynyp, eki myńnan astam tusaq qoılar tuqymdyq túrlendirilip, meje 99 paıyz oryndalǵan. «Qulan» baǵdarlamasy boıynsha josparǵa sáıkes asyl tuqymdy 14 bas aıǵyr men 210 bas analyq jylqy satylyp alynǵan.

Mal bordaqylaý alańdaryn jáne januıalyq sút fermasyn ashý úshin bıylǵy jyldyń birinshi jarty jyldyǵynda aýdan boıynsha barlyǵy 116 mln. 300 myń teńge nesıe alyndy. Onyń ishinde «Aýyl sharýashylyǵyn qarjylaı qoldaý qory» aksıonerlik qoǵamynan mal bordaqylaý alańdaryn ashýǵa  seksen jeke kásipker 80 mln. 800 myń teńge qarjy alyp jumysyn júrgizgen. Olar  538  bas iri qara mal satyp alǵan. Al, «Yrys» mıkro qarjy uıymy» JSHS-nen berilgen 12 mln teńge nesıege esepti merzimde 5 joba qarjylandyrylyp, 70 bas mal satyp alynǵan.

http://rgmedia.kz/