Ońtústik Qazaqstan oblysy úshin kásipkerlikke qyzyǵýshylyq joǵary deńgeıde, ásirese aýyl sharýashylyǵy salasynda óz isterin bastaǵysy keletin azamattar jetkilikti. Buǵan memlekettik «Agrobıznes-2020», «Sybaǵa» baǵdarlamalarynan da qoldaý bar ekenin aıta ketken jón. 2016 jyly kásibin endi ǵana bastaǵan jáne bastaýǵa nıetti 140 azamat bizdiń «Kásipkerlik mektebinde» tórt kúndik sabaq aldy.Mundaı sabaqta biz shaǵyn jáne orta bıznesti damytýdyń joldary men múmkindikterin tanystyramyz. Iaǵnı, kásipkerdiń psıhologıasy, zańdy qyry, menedjment, marketıń, salyq, bıznes-joba jasaý syndy 6 taqyryp  boıynsha jumys júrgizýdi úırenedi. Sol oqýdan keıin arnaıy sertıfıkat beriledi. Al bul sertıfıkatty alǵandar kásibin bastaýǵa nemese keńeıtý maqsatynda jeńildetilgen nesıelerdi ala alady.

Asyl tuqymdy bir buqany baǵatyn adamǵa memleket tarapynan 154 myń teńge sýbsıdıa bólinedi. Al, asyl tuqymdy bir buqaǵa 30 sıyrdy qosyp baqsa, ár sıyrǵa 18 myń teńge kóleminde sýbsıdıa alýǵa bolady.
Kásipkerlikke qoldaýdy tıimdi paıdalanyp júrgen «Danýna» JK taıaýda taǵy 80 buqaǵa quny 12 mln teńge turatyn bıznes-jobaǵa ótinish berdi. Sol ótinish negizinde biz aldaǵy 5 jylda atqaratyn jumystarǵa josparyn ázirledik. Kásipker aldaǵy ýaqytta mal bordaqylaýmen ǵana shektelmeı, sút óndirý kásibine de óz úlesin qosa alady.

          «Danýna» JK bordaqylaý kezeńinen ótip, daıyn bolǵan iri qarany «Et Agro-Mankent» aýyl sharýashylyq óndiristik kooperatıvine ótkizedi. Al sút ónimderin «Fýd-Master» kompanıasyna tapsyrady. 

60 saýyn sıyrǵa qazir 2 ǵana saýynshy jumys isteıdi. Kásipkerdiń 6 uly da áke jolyn tańdapty. Odan bólek, «Danýna» jeke kásipkerligi «Jumyspen qamtý – 2020» baǵdarlamasy aıasynda 5 adamdy jumysqa qabyldaǵan.

Aýyldyq veterınarıa ortalyǵynan arnaıy bólingen mal dárigeri kúnine eki ret, tańerteń jáne keshkisin sıyr, buqa, taıynsha, buzaýlardy tekseredi. İri qarasy aýyrǵanda «tabysym toqyrady» demeı, aýyrǵan malǵa jany ashıtyn Álisher Pirnazaruly kásiptiń qıyndyqtaryn da eske aldy.

– Qandaı is bolmasyn ózdiginen dóńgelep júre bermeıdi. İri qara aýyrsa, onyń shyǵyny zor. Qansha kúsh jumsap bordaqylaǵan sıyr, buqalar bir aptada salmaǵyn joǵaltady. Jazdyń kúnderi terisin kóbelek jaryp shyǵarda jappaı qınalady. Degenmen, kásipti bastaǵan adam paıda tabýdan buryn sol kásipke jan-tánimen berilýi kerek. Sonda qıyndyqtar kezdeskende «tabys tappadym» dep kúızelýdiń ornyna, kásibine janashyrlyqpen qaraıdy, – deıdi ol.

«Danýna» jeke kásipkerliginde 60 sıyr, 25 buqa bar. İri qarany 200 basqa kóbeıtip, kúnine 1 tonna sút ótkizetin bolsa, sút óndirisine de sýbsıdıa alýǵa múmkindigi bar. Aıta keterlik bir jaıt, kásibin súıgen Álisher Pirnazaruly iri qaranyń jem-shópten qalǵan qaldyǵyn kádege jaratý úshin ǵana úırek-qaz ustaıdy eken. Áıtse de, aldaǵy 5 jylǵa jospary bar kásipkerdiń et ónimine bolashaqta qus eti de úles qosýy ábden múmkin.

Meıirman BATYRBEKULY, 
«ONTUSTIK» Kásipkerlerge qyzmet kórsetý ortalyǵy Saıram aýdandyq fılıalynyń bıznes-treneri