Búgin 28 qarasha, Atyraýdaǵy 2 sotta sot prosesteri aıaqtalǵan Maks Boqaev pen Talǵat Aıanovqa sot úkimi oqyldy. Sot úkimin Azattyq radıosy tikeleı efırde kórsetti.

Oblystyq sottyń baspasóz hatshysy Boranbaı Ǵalıev sot zalynyń tarlyǵyna baılanysty BAQ ókilderi syımaı qalǵanyn aıtyp, sotqa qatysýshylardyń keıbirin basqa bólmeden arnaýly monıtorlardan baqylaýdy surady. Buǵan deıin sotqa qatysa almaǵan jýrnalıser úkim oqylatyn bolǵan soń sot zalyna kirgizildi. Sotqa jınalǵan adamdar óte kóp boldy. 

Sýdıa Gúlnár Dáýleshova olardy "zańsyz mıtıńter uıymdastyrdy", "jalǵan aqparattar taratty", "ultarazdyq týdyrdy" dep aıyptap, 5 jylǵa sottady. Sýdıa osyndaı aıyptar taǵylǵan Talǵat Aıanǵa da 5 jyl túrme jazasyn kesti. Sot sonymen birge olarǵa úsh jyl qoǵamdyq jumyspen aınalysýǵa shekteý qoıý jáne 250 myń teńge aılyq kórsetkish esebinde (bir AEK - 2121 teńge) aıyppul salý týraly úkim kesti. Úkim boıynsha, Boqaev pen Aıan jazalaryn jalpy rejımdegi kolonıada óteýi tıis.

Aıta ketetin bolsaq, 21 qarasha kúni jaryssózde prokýrorlar Qasym Sadyqov pen Marat Habıbýllın Boqaev pen Aıanǵa taǵylǵan "zańsyz mıtıńter uıymdastyrdy", "jalǵan aqparattar taratty", "ultarazdyq týdyrdy" dep aıyptap, "olardyń kinálary tolyq dáleldengenin" aıtty.

Prokýror Maks Boqaevqa segiz jyl bas bostandyǵynan aıyrýdy, úsh jyl qoǵamdyq jumyspen aınalysýǵa shekteý qoıý jáne 250 myń teńge aılyq kórsetkish esebinde aıyppul salýdy surady. Memlekettik aıyptaýshylar Aıandy da segiz jylǵa sottaýdy, úsh jyl qoǵamdyq jumyspen aınalysýǵa shekteý qoıýdy jáne 250 teńge aılyq kórsetkish esebinde aıyppul belgileýdi suraǵan bolatyn.

Maks Boqaev pen Talǵat Aıan 24 sáýir kúni Atyraý qalasynda jer reformasyna qarsylyq retinde ótken jappaı mıtıńten soń qamaýǵa alynǵan. Maks Boqaev pen Talǵat Aıanǵa birqatar qylmystyq baptar (sonyń ishinde "arazdyq týdyrý", "zańsyz mıtıń uıymdastyrý") boıynsha aıyptary taǵylǵan. Azamattyq belsendiler bul aıyptardyń eshqaısysymen kelispeıdi.