Áıgili aıtys aqyny Erkin İlıauly 2000 jyly shilde aıynda Monǵolıanyń Baıan-Ólgıı aımaǵynda óner saparynda boldy. Adýyndy aqyn neshe márte aıtys ótkizip, Monǵolıadan qaıtarynda qaýmalaǵan halyqtyń usynysymen Ólgeıdegi qazaqtarǵa bylaı dep qoshtasý óleńin arnaǵan eken:

Ómir ǵoı tarıhty shımaılaǵan,

Ómirde kúnde oılanam, túnde oılanam.

Emes pe, qıal óleń, qıal dastan,

Keýdemde óleń jóńkip, kúı almasqan.

Qoıynyńnan Baıan-Ólgıı attanarda,

Halqyńdy ketip baram qıa almastan.

Senderge sezimdi óleń qaldyrmasam,

Elime qaıtyp baram uıalmastan.

Kelgenshe qıal qusym ala qyzǵan.

Samǵadym myna quzdan, ana quzdan.

Armandy jasap alý ońaı emes,

Bolmasa balada erlik, ákede ujdan.

Sizderge esigimiz aıqara ashyq,

Ketpesin barys-kelis aramyzdan.

Ómirge jyrdan basqa nemiz qalad(y),

Baýlary úzeńgimniń segiz qabat.

Arýaqtar qabyrynan bir aýnasyn,

Qartaıǵan osy ólkede negiz qalap.

Sizderdi saǵynǵanda aǵaıyndar,

Kók buıra kózderimnen selim aǵad(y).

Bar meniń júregimde názik arman,

Men degen tarıhta jazylar jan.

Keıingi bolashaqtyń urpaqtaryn,

Saqtasyn kózi qylı qazylardan.

Jyr jazaıyn aǵaıyn, jyr jazaıyn,

Men nege jyr jolynda turalaıyn.

Álimdi talǵamymdy bil aǵaıyn,

Men senen at pen túıe suramaımyn.

Bereke qalǵan mıras atadan jol,

Dostyǵym bosamaıtyn bosaǵam bol.

Taǵy da tiri júrsem kelip turam,

Qosh aman bol, aǵaıyn qosh aman bol!

Symbatyń qyzyqtyrdy qyzǵyn dala,

Jaý qyrǵan osy ortada bizdiń baba.

Kóp emes óleńimnen urpaǵyńa,

Tastasam kitap jazyp júz myń dana.

Ómirge kelý-ketý eriktilik,

Óshpeıtin qalýy shart izdiń ǵana.

Qyspaqqa talaı-talaı tózip kelem,

Týǵan el jyrdan basqa ne júktep eń.

Men seniń qushaǵyńda óleń aıtyp,

Myqtyny talaı-talaı kórip kelem.

Atamnyń ortaq ustar enshisi edi,

Óleńdi baıǵazy etip bólip berem.

Adamnyń tabylar ma syıy mundaı,

Aqynnyń kelip turmas kúıi mundaı.

Qýa tirlik qıynyńdy-aı, qıynyńdy aı.

Kezikti torqaly toı jıynyńda-aı.

Ómir ótip barady ómir ótip,

Qıturqy qý dalanyń quıynyndaı.

Men de óleń aıtyp kelem armanym ánim,

Qapysyn taýyp aıtyp qarmanamyn.

Qalǵansha qasyq qanym qarmanarmyn,

Qushaqtap jas qabirdiń jar qabaǵyn.

İshinde jatyp sonda tar molanyń,

Estir me em, tiri aqynnyń zarlaǵanyn.

Keteıin óleń egip, óleń egip,

Qoınyna mynaý baıtaq keń dalanyń.

Jastyǵym ótip ketken qaıta oralsyn,

Sarǵaımas óleńimdi aıta qalsyn,

Bárine qonaqtardyń aıttym sálem,

Jerine menen sálem aıta barsyn.

Gúli eken de, Altaıdyń gúli eken de,

Erkindik óleń aıtyp júr eken de.

Aǵaıyn qosh aman bol basymdy ıem,

Áset, Birjan áli tiri júr eken de.

Daıyndaǵan: Erlan Tóleýbaıuly