Astana qalasynyń atýyn ózgertý týraly daý áli toqtamady. Májilis depýtaty Qýanysh Sultanov Astana ataýyn ózgertýge qatysty áleýmettik jelide aıtylyp jatqan synı pikirler kóńiline tıetinin aıtyp, jýrnalıserge suhbat berdi. «Prezıdent qalaı qabyldaýy kerek edi? Men osylaı bolýy múmkin ekendigin bildim... Óte baısaldy, durys qabyldady», - dedi Qýanysh Sultanov jýrnalıserdiń suraǵyna jaýap bere otyryp.

Depýtat osy kúnderi áleýmettik jeli aıtylyp jatqan synnyń kóńiline tıetinin jasyrmady. «Bul árkimniń quqyǵy. Biraq saıası mádenıet bolýy kerek. Pikirdi synaýǵa bolady, biraq jeke basqa tıisýge bolmaıdy. Qandaı da bir ıdeıa, usynys úshin adamdarǵa til tıgizgen jón emes. Onyń pikirimen kelispeı-aq qoıyńyz, biraq adamdy bilmeı turyp, ol týraly neshe túrli aıtýǵa bolmaıdy. Bul bizde saıası mádenıet jetkiliksiz ekenin kórsetedi», - deıdi ol.

Sultanov buǵan deıin Astanaǵa elbasynyń esimin berýdi usynyp, qoǵam narazylyǵyna qalǵan bolatyn. Ony óziniń keıbir áriptesteri qoldaǵanymen, qala atyn aýystyrý qajet bolsa Petropavl men Pavlodar sıaqty qalalardyń aty bar ekenin aıtqan edi bylaıǵy jurt.

Aıta ketetin bolsaq, Elbasy eshkimge Astanany ataýyn aýystyraıyq dep bastama kóterýge tapsyrma bermegenin aıtyp, «Qaı nárse bolsa soǵan «Nur» degen sózdi qosady. Ol meniń tulǵammen baılanysty bolyp shyǵady. Ony men talaı aıtqanmyn. Anaǵan da, mynaǵan da alyp keledi de Parlament astanany meniń atymmen ataý týraly boljam aıtypty. Men eshkimge ondaı usynys aıtqan joqpyn», - degen edi. Elbasy Táýelsizdik jyldaryndaǵy el jetistikteri jalǵyz óziniń eńbegi emes ekendigin, senimdi serikteriniń kúsh biriktirýi nátıjesinde qol jetkizilgenin atap ótken bolatyn.

Esterińizge salsaq, Elbasy el astanasynyń ataýyn ózgertý týraly pikirge «Rossıa 24» arnasyna bergen suhbatynda núkte qoıǵan bolatyn.  «Astana - bul brend. Astananyń ataýyn ózgertýdiń esh qajeti joq», - degen edi prezıdent suhbat barysynda.