Rejıser Aqan Sataevtyń «Haker» fılmi AQSH pen Kanadada 2 jeltoqsanda prokatqa shyǵady. Bul týraly Tengrinews.kz tilshisine kartınanyń prodúseri Sanjar Sultanov habarlaǵan.

«Haker» (Anonymous) fılminiń dıstrıbútory – Sony Picture halyqaralyq kompanıasy. Kınokartına qańtar men naýryz aılarynyń aralyǵynda Ulybrıtanıa, Fransıa, Italıa, Avstralıa jáne Latyn Amerıka elderinde shyǵady eken. Prodúserdiń aıtýynsha, kompanıamen kelissózder jarty jyl boıy júrgizilip, kelisimge qol qoıylǵan. Endi osy elderdegi kórermender rejıser Aqan Sataevtyń kartınasyn tamashalaı alady.

Al qazaqstandyq kınoteatrlarda fılmdi 1 jeltoqsannan bastap kórýge bolady. Kartına Qazaqstanda bir ret kórsetilgen. Fılm 2015 jyly «Eýrazıa» halyqaralyq kınofestıvaliniń shymyldyǵyn ashty. Aqan Sataev suhbattarynda óz kartınasyn qazaqstandyqtarǵa kórsetkisi keletinin, biraq kartınanyń jaryqqa shyǵý prosesiniń 2 jylǵa sozylyp ketkenin birneshe márte aıtqan bolatyn.

«Haker» - Aqan Sataevtyń sheteldik kórermenge arnalǵan tuńǵysh fılmi. Fılmniń Túsirilim jumystary Torontoda, Nú-Iorkte, Gonkongta jáne Bangkokte 2014 jyly ótken bolatyn. Basty rólderde amerıkalyq akterler Kallen MakOlıff jáne Lorreın Nıkolson (Djek Nıkolsonnyń qyzy) oınaıdy. Tımýr Jaqsylyqov pen Sanjar Sultanov jazǵan senarıde kredıt kartalary arqyly alaıaqtyq jolmen aqsha tapqan hakerdiń ómiri týraly baıandalady.