Búgin Aqtóbe oblystyq Qylmystyq ister jónindegi mamandandyrylǵan aýdanaralyq sotynda aǵymdaǵy jyldyń 5 maýsymynda oryn alǵan terakt boıynsha aıyptylarǵa úkim shyǵaryldy. Sot 7 adamdy ómir boıy bas bostandyǵynan aıyryp, olardy erekshe rejımde jazasyn óteý týraly jazaǵa kesti, dep habarlaıdy QazAqparat.
Taǵy eki negizgi aıyptalýshy Jubanov Aıdos pen Abdrahmanov Azamattyń jazasyn 22 jáne 20 jylǵa erekshe rejımde óteýge kesti. Qolǵa túsken 29 kúdiktiniń ishinde 9-y basty aıyptalýshylar bolatyn. Olarǵa birqatar qylmystar boıynsha, sonyń ishinde terakt jasady degen aıyp taǵylyp otyr. Aıta keterligi, buǵan deıin memlekettik aıyptaýshylar Jubanov Aıdosqa 25 jyl jáne Abdrahmanov Azamatqa 22 jyl, al qalǵan jeteýi Baqyt Qýanyshbaev, Asqat Imanǵalıev, Sadıhov Anýar, Álibek Aqpanbetov, Asqat Rahmetov, Jańabaı Qýanyshbaev, Arsen Tańatarovtarǵa ómir boıy bas bostandyǵynan aıyrý jazasyn suraǵan bolatyn. Sot olardyń 7-eýine ómir boıy bas ostandyǵynan aıyrý týraly úkim shyǵardy. Qylmyskerlerdiń múlikteri tárkilenip, jazasyn erekshe rejımde óteıtin bolady. Qalǵan 18-ne qylmys týraly quzyrly organdarǵa habarlamaý (QR QK 434 baby), 2-eýine qylmysty jasyrý áreketteri (QR QK 432 baby) boıynsha aıyp taǵylýda. Sonymen qatar, Aqtóbede 2016 jyldyń 5 maýsymy kúni bolǵan terorıstik aktige qatysqan Abdrahmanov pen ózge de azamattardyń qylmystyq isteri boıynsha, sot 21 qarasha kúni aıyptalýshylardyń sońǵy sózderin estigen edi. Birqatar qylmystar jasaǵan, sonyń ishinde terorıstik akt uıymdastyrdy dep sottalǵandar men aıyp taǵylǵan azamattar istegen áreketterine ókinetinderin aıtyp, sot ókilderine ómir boıyna qamaýǵa alý týraly úkim shyǵarmaý jóninde ótinish jasap, otbasylary men balalaryna qaıtqylary keletindikterin aıtqan. Sottalǵan A.J.Jubanov pen A.A.Abdrahmanov (terrorlyq aktiniń qatysýshylary) ta sot qyzmetkerlerinen qatań úkim shyǵarmaýdy surady. Qylmys týraly quzyrly organdarǵa habar bermegeni jáne qylmysty jasyrǵany úshin sottalǵandar (Gasaevtan basqasy) sotta istegen áreketterin moıyndap, sottan bas bostandyǵynan aıyrý jazasyn qoldanbaýdy surady. R.M.Gasaev bolsa sot ókilderinen ózin aqtap shyǵýdy surady. Aıta keteıik, Aqtóbede terakt 5 maýsym kúni boldy. Terrorısterdiń toby «Pallada» jáne «Pantera» atty qarý-jaraq dúkenderi men №6655 áskerı bólimine qaraqshylyq shabýyl jasap, sonyń saldarynan 8 adam mert boldy. Olardyń 3-ýi áskerı qyzmetkerler. Terorızmge qarsy baǵyttalǵan operasıa barysynda 18 adamnyń kózi joıylyp, 9 adam quryqtaldy.
Eske sala ketsek, búgin sot úkimi shyqqan Lańkestik jasaǵan salafıttermen atysqan aqtóbelik polıseı «Altyn adam» ataǵyn ıelengen edi.
