2016 jyldyń 9 qarashasynda Qazaqstan halqy Assambleıasy etnosaralyq qatynastar ortalyǵy Dostyq Úıinde  T.K. Júrgenov atyndaǵy Qazaq Ulttyq óner akademıasynyń profesorlary Álıa Álimjanova men Meńdiǵanym Shaımerdenovanyń «Naýryz meıramy: kóktemniń, birliktiń, keshirimdilik  pen rahymdylyqtyń qutty meıramy»   atty oqý quralynyń tusaýkeseri ótti.

Kitaptyń resenzentteri – ál-Farabı at. QazUÝ profesory T.H. Ǵabıtov pen G.T. Aldambergenova. İs-sharaǵa Qazaqstan halqy Assambleıasynyń músheleri, ál-Farabı atyndaǵy Qazaq Ulttyq ýnıversıtetiniń Fılosofıa jáne saıasattaný fakúltetiniń Dintaný jáne mádenıettaný kafedrasynyń oqytýshylary, magıstranttary men stýdentteri,  T.K. Júrgenov atyndaǵy Qazaq Ulttyq óner akademıasynyń magıstranttary, basshylyǵy jáne profesorlary, belgili qoǵam qaıratkerleri qatysty.

Elimizdiń 25 jyldyq táýelsiz kezeńi tarıhynda qalyptasqan kópetnosty qazaqstandyq qoǵamdaǵy ulttyq memlekettilikti nyǵaıtýda, mádenı dástúrlerdi jalǵastyrýda memlekettik merekelerdiń róli erekshe. Sonyń ishinde Naýryz merekesi – tarıhy tereńnen bastaý alatyn, urpaqtan urpaqqa mıras etilgen baı mádenıetimizdiń kórinisi, mádenıetter sabaqtastyǵynyń jemisi. Naýryz meıramy  – Taıaý Shyǵys elderi, Orta Azıa halyqtary, kúlli Túrki dúnıesiniń dúbirli merekesi. Naýryz – jyl basy, kún men túnniń teńelgen kezi, aq túıeniń qarny jarylǵan kún, Samarqannyń kók tasy jibıtin kún, Ulystyń Uly kúni. Bul merekeniń dinı belgileri joq bolǵandyqtan kópultty, kóp konfesıaly Qazaqstan halqy Naýryzdy bir kisideı toılaıdy. Bul merekeniń saıası, mádenı-áleýmettik mańyzy óte zor. Naýryz meıramy – ultaralyq tatýlyq pen kelisimniń, birlik pen toleranttylyqtyń nyshany, jastarda  patrıottyq sezimdi oıatatyn, eline, mádenıetine degen qurmetti asqaqtatatyn birden bir meıram.

Naýryz meıramynyń tarıhy men mazmunyn zerttep, mańyzdylyǵyn aıqyndaǵan avtorlar qazaq mádenıetiniń dástúrli kezeńi men qazirgi jahandaný prosesteri arasyndaǵy sabaqtastyq ıdeıasyn bir oqýlyqqa syıdyrǵan. Bul elimizdiń qoǵamdyq-gýmanıtarlyq bilim salasynyń damýyna, jalpy dúnıetanymdyq kókjıektiń keńeıýine, qoǵamda ultaralyq qatynastardyń kelisimdene túsýine atsalysady. Qazaqstan halqyn biriktirýshi ulttyq ıdeıasyn paıymdaýdaǵy sıpaty kópetnosty halqymyzdyń yntymaqta ómir súrýine, elimizdegi rýhanı jáne áleýmettik keńistikti jańǵyrtýǵa óz úlesin qosatyndyǵyna senimdimin.

Tursyn Hafızuly Ǵabıtov

Fılosofıa ǵylymynyń doktory, profesor, akademık

Aıbala Manapova

QazUÝ

Fılosofıa jáne saıasattaný fakúlteti

Dintaný jáne mádenıettaný kafedrasynyń

Mádenıettaný mamandyǵynyń 2 kýrs magıstranty