Qudaı baq bermegen soq, kezinde jigitter «saǵan ǵashyqpyn!» dep tap bermegen soń, oń jaq bosaǵada otyryp qaldym. Oqý dedik, anany mynany shoqý dedik, qysqasy ýaqytty óltirip, aqyrynda opyq jedik! Kúıeýge tıeıin desem, «srogym» ótip ketken, jas balalar «Apaı...» dep syzylady. Kúıeý degen nan emes, júgirip baryp, dúkennen satyp ala qoıatyn. Kúıeý degen qazir kúıip tur, defısıt! 
Bir kúni qurbym kele qaldy. Jeti jasar balasyn jetektep alypty.
–Turmysqa shyqtyń ba, ne?–deppin salǵan jerden.
–Kim ala qoıady deısiń, biz sıaqty kári qyzdardy? Ózim týyp aldym.
–Kak, qalaı?
–Tap solaı. Ol ońaı. Bir shelek kúldi esik aldyna tóktim de, ary aýnadym, beri aýnadym. Aqyrynda aıaǵym aýyrlap...
–Qoıshy, Bátıma! Shynyńdy aıtshy? –dep qyzyǵyp kettim, meniń de kúlge aýnaı salǵym kelip turǵany? Kúldi qaıdan alsam eken? Egiz bala týý úshin eki shelek kúl kerek shyǵar? Oıym on saqqa júgirdi. 
–Onyń reseptin bereıin. Bir shelek kúlge jarty qasyq maıonez qosyp, bir qasyq sirke sýyn sebelep, qum shekerdiń jarty kılosyn aralastyrasyń da, qospany úlkendeý shyt matanyń ústine tógip jiberip, útsine aýnaısyń kelip, aýnaısyń kelip! Boldy! Srazym eki qabat bolasyń! Qazir kári qyzdar bóten bireýden ózi úshin bala týyp alýdy trendke aınaldyryp aldy ǵoı! Bala degen qýyrshaq emes, jeke tulǵa emes pe? Al, men kúlge aýnap týdym!
Qala shetinde jer úıde turatyn, áli gaz bara qoımaǵandyqtan, peshine ot jaǵatyn naǵashy ápkemniń úıine qaraı júgirip bara jatyr edim, qurbym qolymnan ustaı aldy.
–Qaıda? –dep surady.
–Kúlge aýnaıyn dep.
–Jyndysyń ba? Ásheıin oınap aıtamyn! Men sıaqty óziń úshin balaly bolǵyń kelse, lúboı erkekke erkele. Ruqsat sura. Erkekter márt keledi. Týǵannan keıin keregi de joq! Áne, oınap júrgen balam óz bastyǵymnan... Jalynyp, jyladym. Sosyn ýaqytsha mahabbat ınvestory boldy.
–Kónbeı qoısa she?
–Zorla...
–Ólá, uıat qoı...
Ne kerek, ózim úshin, bolashaǵym úshin, qartaıǵanda súıenishim bolýy úshin bala syılaıtyn erkek izdep kettim. Biraq qalaı? Kimniń kórpesin tartyp qalaıyn? Meniń de kim kóringennen emes, bastyǵymnan balaly bolǵym keldi. Sosyn kabınetin tyqyldattym. Basym salbyrap, shashym jalbyrap, qoldarym qaltyrap...
–Aǵaı... –dedim men.
–Ia?
–Aǵaı, birdeńe aıtaıyn dep edim.
–Aıta ǵoı?
–Ne ǵoı, maǵan aılyǵymnyń esebinen... Qalaı desem eken? İmm, obshym, sizden bala týǵym keledi. Srochno... Qonaq úıge óz qaltamnan tóleıin...
Bastyǵymnyń kózderi ústeline domalap túsip ketti ǵoı deımin? Ornynan atyp turdy. Báse, bul kisi men oılaǵandaı jeńiltek emes... Jýan judyryǵymen stolyn qoıyp qalǵanda, turmysqa shyqpasam da, týyp qalardaı tapyraqtap, tura qashtym! Sol ketkennen mol ketip, jumysqa da barmaı qoıdym! Qudaı-aı, erkekter–aı, ne istesem eken?