Vasılıı Levıt Olımpıadadan alǵan syıaqysyn jumsaýǵa ýaqyty joq ekenin málimdedi, dep jazdy sports.kz.

«Shynymdy aıtsam, syıaqymdy áli jumsaǵan joqpyn. Ol jaǵyn oılaıtyn meniń tipti, ýaqytym da joq. Oıymdy bólmeý úshin bul isti keıinge shegerip qoıdym. Qazir kóptegen is-sharalar ótip jatyr. Bizdi nazardan tys qaldyrmaı, kishkentaı da bolsyn eńbegimizdi baǵalap jatqany qýantady. Alǵystan basqa aıtarym joq», – dedi Vasılıı Levıt.

Ol sondaı-aq, jańa jylǵa arnalǵan fılmniń túsirilimi týraly da aıtyp berdi.

«Men ózime qatysty epızodtarǵa tústim. Bul men úshin úlken tájirıbe boldy. Árıne, ózimdi aktermin dep aıta almaımyn. Men neǵurlym sportqa jaqynyraqpyn», – dedi ol.

Budan bólek, ol qazaqstandyq boksshylardyń aldaǵy josparlary týraly aıtýdy da esten shyǵarmady.

«Komandamyz osy aıda Saryaǵashta jınalady, al kelesi aıda Almatyda jalpy-fızıkalyq daıyndyǵymyzdy bastaımyz. Jekpe-jekter máselesi áli sheshilgen joq, ol jaǵy jattyqtyrýshylardyń qolynda», – dedi Olımpıadanyń kúmis júldegeri.

Esterińizge sala keteıik, keshe bokstan Rıo-de-Janeıro Olımpıadasynyń kúmis júldegerleri Vasılıı Levıt pen Ádilbek Nıazymbetovke Elbasy tapsyrmasyna sáıkes taǵy 100 myń dollardan syıaqy berildi.