Aıaz ataǵa jazǵan hatymen qazaqstandyqtardyń júregin tebirentken Ásel Hýsaınova bastan keshken oqıǵasyn KTK arnasynyń «Drýgaıa pravda» baǵdarlamasynda aıtyp berdi dep habarlaıdy stan.kz

Boıjetken Almatydaǵy JOO-nyń birin támamdap, úıine qaıtýǵa asyǵady. Qýanyshy qoınyna syımaı alyp ushyp kele jatqanda mingen kóligi jol apatyna ushyraıdy. Ásel kóliktiń aldyńǵy jaǵyna otyrǵan. Jedel járdem qyzmetin kútpesten ony emhanaǵa jetkizedi. Alaıda dárigerler qolynan keletin dármen joǵyn aıtyp, ata-anasyn qyzdarymen qoshtasý úshin palataǵa kirgizipti.

Ásel essiz kúıde jatqanda onyń aıaǵyn kesýge týra keledi.

«Men únemi aıaǵymdy sezetinimdi aıtyp jyladym», – deıdi Ásel.

Alaıda, qyzǵa fızıkalyq soqqydan góri moraldi soqqy aýyr tıdi. Odan sóz baılasyp júrgen jigiti teris aınaldy. Olar qaıǵyly oqıǵa bolmaı turǵanda eki aptadan soń úılenetin bolǵan. Biraq, kúıeýjigit Áseldiń qurbysyna úılenip ketken.

“Úılený toıymyzdyń bolýyna eki apta qalǵan. Bárine daıyn edik. Keıin jigitimniń meniń qurbyma úılengenin estidim”, – dep boıjetken satqyndyq jaıly aıtyp berdi.

6 jyldan beri Taldyqorǵan turǵyny Ásel 30 ota jasatty. Eldiń bedeldi emhanalaryna qaralyp kórdi. Jarty jyl buryn onyń aıaǵyn bóksesine deıin kesýge týra keldi.

Birneshe aı boıy Ásel eshqandaı aýyrsynýdy sezbegen. Tipti jumysqa da shyǵypty. Biraq, jaqynda qulap qalyp, aıaǵy qata irińdep ketti. Dárigerler aıaǵyn endi jambasyna deıin kesý keregin aıtypty.

«Dárigerler mende eki jol baryn aıtty. Onyń biri: aıaǵymdy jambasyma deıin kesý. Munyń jaqsy emes ekeni belgili. Men ómir boıy tósekke tańylyp jatatyn bolam. Nemese Qytaıǵa, ózge elderge baryp emdelip kórý. Aıaz ata, meniń úmitimdi aqtap, qaıyrymdy adamdardy tabýǵa kómektesshi. Meniń protezben júre alatyndaı qalpymdy saqtaýǵa qol ushyn beretin jandardy taýyp bershi. Jańa jylǵa maǵan osyndaı syı jasashy», – dep jazady Ásel Hýsaınova óz hatynda.

Jelige taraǵan hat arqyly Áseldiń emine qomaqty qarajat jınalyp, Ásel Qytaıǵa emdelýge attandy.

«Eshqashan meniń qaıǵyma osynshama adam qaraılasady dep oılamappyn. Bárine alǵys aıtamyn, – deıdi Ásel.