Kókbóriniń sińirindeı sirimin,
Sol úshin de ajalsyzbyn, tirimin.
Shyndyq úshin qurbandyqqa shalynyp
Shyryldaǵan qulyndardyń birimin.

Talaı-talaı tonaldym da taptaldym,
Ózimdi-ózim joǵaltýǵa shaq qaldym.
Kók kóılekti kóktemede týylyp
Jeltoqsanda erip ketken aq qarmyn.

Kúńirense ún shyǵady kórden de,
Shertilmegen sherim qansha shermende.
Óz tilińde ómir súrip,
Sonan soń,
Ne jetedi óz tilińde ólgenge.

Men surasam – teńdigimdi suradym,
Teńdigimniń kemdigine jyladym.
Aı kúzetip Arý súıer jasymda
Máńgiliktiń qushaǵyna quladym.

Kek alatyn káriden de jastan da,
Qý tirshilik qupıasyn ashqan ba?!
Baýyr qaldy ózegine órtenip
Ana qaldy sútin saýyp aspanǵa.

Táýelsizdik – Qazaq úshin ǵajap qut,
Ǵajap qutqa júrmeıdi endi mazaq túk.
Bóri minez Babalardyń armany – 
Aınalaıyn, altyn qanat – Azattyq!

Saǵan qurban jastyǵym da janym da,
Saǵan qurban atpaı qalǵan tańym da.
Tereńdigi qabirden de tereńdeý
Meniń qaıǵym – Qazaǵymnyń qanynda!

Álibek Shegebaı