Bir ret qana paıdalanýǵa arnalǵan jaıalyqtardy kóbi «pampers» deıdi. Alaıda, «pampers» bir rettik jaıalyqtardyń biriniń ataýy. Aǵylshyn tilinen aýdarsaq «erkeletý, álpeshteý» degen maǵynaǵa ıe bul sóz halyq jadynda jaqsy jattaldy. Soǵan bola barlyq túrine osyndaı ataý berý, árıne, durys emes.
Bir rettik jaıalyqtardy HH ǵasyrdyń sońyna taman Amerıkanyń Nebraska shtaty, Mılford qalasynyń turǵyny Vıktor Mıllz esimdi ónertapqysh oılap tapqan. Ol hımıalyq tehnologıa salasy boıynsha otyz bes jyl «Procter@Gamble» kompanıasynda jumys istep, tapqyrlyǵymen ataǵy shyqqan. Sheber zeınetke shyǵyp, qartaıǵan shaǵynda jalǵyz qyzynan týǵan jıenin baǵýǵa týra kelgen. Árıne, jumys náresteniń tek tamaǵyn berýmen ǵana shektelmeıdi. Sábıdiń jaıalyqtaryn qaıta-qaıta jýyp, ony keptirý de kerek. Qart adamǵa qaıta-qaıta nájis tazalaý da ońaı emes. Sóıtip júrgende shaldyń mıyna «jýmaıtyn jaıalyq nege oılap tappaımyn» degen oı túsedi. Aqyry Vıktor álemde alǵash ret náresteniń úlken-kishi dáretin boıyna sińirip alatyn «jaıalyq» oılap taýyp, óziniń jıeni arqyly synaqtan ótkizedi. Alaıda, ony sol kezde eshkim paıdalana qoımaıtyn. Búgingi kúni kez kelgen sábıdiń janynan tabylatyn deńgeıge jetti. Sebebi, ol analar úshin qolaıly bolyp otyr.
Atalǵan jaıalyqtyń qarapaıym jórgekten birshama artyqshylyǵy baryn da moıyndaýymyz qajet. Máselen, náreste terisi tym názik bolǵandyqtan, kishkene ylǵaldyń ózi ony titirkendiredi. Al, pampers bala terisin titirkenýden saqtap, qalypty ustaýǵa jaqsy kómektesedi. Alaıda, keıbir analar pamperstiń paıdasy men zıanyn ajyrata bilmeıdi. Sonymen…
Jalpy, pamperstiń ylǵal sorǵysh bóligi selúlozadan jáne jelatın tárizdi polıakrılat sharıkterden jasalady. Polıakrılat óz salmaǵynan elý ese aýyr ylǵaldy sińirip jáne ustap tura alady. Onyń ústine búginde «tynys alatyn», ıaǵnı aýa ótkizetin pamperster shyǵaryla bastady. Olardyń syrtqy qabaty usaq sańylaýlardan turady, al materıaly maqta, mataǵa uqsas. Osy arqyly bala terisine aýa jetip turady da, ylǵal bý ishte turyp qalmaıdy. Alaıda, dárigerler pampersti durys paıdalana bilý qajet ekenin aıtady.
«Jalpy, sábılerdi bir jas alty aılyǵynda túbekke otyrǵyzý kerek. Buǵan deıin pampersti paıdalanǵan jón. Alaıda, dáriger retinde biz pampersti dalaǵa shyqqanda nemese qonaqqa, taǵy basqa jerlerge barǵanda ǵana kıgizýge keńes beremiz. Onyń ishinde er balalarǵa pampersti jıi kıgizbegen jón. Bul sábıdiń jetilýine zıanyn tıgizýi múmkin»
Kóptegen analarda sábıge pampers kıgizý óte zıan degen túsinik basym. Alaıda, barlyq másele ony durys paıdalana bilýde.
Birinshiden, pampers teriniń qurǵaqtyǵyn qarapaıym jórgekten góri jaqsy saqtaıdy. Sonyń arqasynda jórgek dermatıti búginde sırek kezdesedi. Pampers kıgende bala terisiniń rN deńgeıi de qalypty bolady. Ekinshiden, balanyń túbekke otyrý mezgili onyń pampers kıgen-kımegenine baılanysty emes. Bul – ata-anaǵa baılanysty jaǵdaı. Demek, balaǵa túbekke otyrýdy der kezinde úırete bilý qajet. Úshinshiden, únemdeý maqsatynda pampersti tıisti ýaqyttan uzaq kıgizýge bolmaıdy. Bundaı jaǵdaıda onyń barlyq artyqshylyqtary joıylady. Tórtinshiden, sábı únemi pampers kıip júrýge tıisti emes. Ony aýystyrǵanda demalýǵa múmkindik berińiz.
Pampers qansha qymbat bolsa da, ony paıdalanǵanda birqatar erejelerdi saqtaý kerek. Balany bir pamperste 6 saǵattan artyq ustamańyz. Ony 4 saǵat saıyn aýystyryp turǵan durys. Balanyń kúni boıy bir pamperspen júrýine múlde jol bermegen jón. Sondaı-aq, balany pamperske úıretpegen abzal. Eger bala oıaý bolsa, pampers kıgizbeı terisin demaldyryńyz. Jańadan shyqqan pampersterdi de abaılap paıdalanyńyz. Ony uzaq ýaqyt kıgizbeńiz, óıtkeni alergıa týdyrýy múmkin.
Sondaı-aq, kóptegen jórgekterdiń ishki betinde arnaıy aloe bálzamynyń syzyqshalary bolady. Jórgek bala terisine tıgen kezde oǵan bálzam sińip, juqa ǵana senimdi qorǵanys jasaıdy. Bul teriniń titirkenýine jol bermeıdi. Bálzam negizinen vazelın men stearıl spırti jáne basqa da qosymsha zattardan turady. Bul – bala úshin múlde zıansyz. Buny bala dárigerleri júrgizgen kóptegen zertteýler dáleldep bergen. Olardyń alergıa týdyrý múmkinshiligi óte tómen.
