Taǵy da radıo baıaǵy... Júrgizýshi jigittiń sózi: "...Qaıys noqtaǵa basy sımaǵan talaı arys uldyń bolǵanyn aqbas tarıh biledi". Osy jerdegi: "qaıys noqta", "aqbas tarıh", "arys ul" degen ásire teńeýlerge endi biraz ýaqyttan soń meniń de qulaq etim úırenip, qalypty sóz retinde qabyldap ketetin túrim bar... Sondyqtan, ázirge pafosqa qarsy azdap bolsa da ımýnıtet tiri kezde jazyp úlgereıin . Birinshiden, noqta - malǵa kıgiziletin, maldy jetekteýge arnalǵan naqty jabdyq. Adamǵa qatysty kórkem shyǵarmasynda ma, pesasynda ma bir jazýshy (Sh.Murtaza bolsa kerek) qoldanǵan eken, jelpildete jónelýdiń retin kórmedim. Ári, asa sátti teńeý dep te oılamaımyn. Eger jan-janýardy buǵaýlaýǵa arnalǵan qural ataýlyny adamǵa qatysty qoldana bersek, onsyz da zoobaılyǵy zor leksıkonymyzdyń qalaı túrlenetinin boljaý qıyn: Qarǵybaý, shider, tusaý, aý, tuzaq, basjip... Qysqasy, haıýanǵa qatysty quraldy "adamǵa kıgizýden" saq bolsa eken keıbir áriptester. Ásirese, onyń "qaıys" ekendigin anyqtap aıtý... múldem qajet emes, aǵataılar. Ekinshiden, "aqbas tarıh" ta, "arys ul" degen teńeý de kúndelikti jýrnalısıkada ábden jaýyr bolǵan, plakatshyl tirkester. Onyń ornyna - tarıh, qaıratker deı salǵannan mazmunǵa zıan kelmeıdi. Kúshenshek arzan sózdi ústeı bergennen aıtpaq oıyńyz altyn bop ketpese kerek-ti. Jáne jalpy: "...uıada ósken ulǵa ulttyń ulylyǵyn uıyta biletin" degen sıaqty túkirigin shashqan daraqy jańyltpashtardyń respýblıkalyq radıodan kúnine san márte aıtylýy tań qaldyrady. Úshinshiden, toqeteri! Aınalaıyn radıobasshylary! Sizderdiń ultqa, elge degen kózsiz hám sheksiz mahabbat sezimderińizdi qurmetteı otyryp, eskertýge májbúrmin: sózdi ornymen, taza, dál, qospasyz, (qoppasyz) qoldanatyn asabalyq, aıtyskerlik shalyqtardan aýlaq adamdardy ǵana efırge shyǵarsańyzdar eken!

(Qasym Amanjoldyń feısbýktegi paraqshasynan)