Osydan 25 jyl buryn kók baıraǵyn jelbiretip, álem tarıhynda Táýelsiz Qazaqstan memleketi paıda boldy. Shırek ǵasyrǵa jýyq ýaqyt ishinde Qazaqstan dańǵyl damý jolynda aldyńǵy qatarly eldermen terezesi teńesetindeı ıgi ister atqaryp, álemdik arenada oıyp turyp óz laıyqty ornyn aldy. Memleketimiz bundaı aýyz toltyryp aıtarlyqtaı jetistikke ult pen ulystyń tatýlyǵy, demokratıanyń berik negizderi men otandastarymyzdyń janqıarlyq eńbegi, sondaı-aq «Elim» dep emirene qyzmet etken esil erlerdiń eren erlikteri arqasynda qol jetkizdi.
El Táýelsizdigin jurtpen qatar Ulttyq ulannyń «Ońtústik» óńirlik qolbasshylyǵy da erekshe atap ótti. Qazaqstan Respýblıkasy Táýelsizdiginiń 25 jyldyǵyna oraı ótken merekelik shara Qazaqstan Respýblıkasynyń memlekettik Gımnin oryndaýdan bastaldy. Barsha áskerı qyzmetshilerdiń keýdeleriniń júrek tustaryna oń qoldaryn qoıyp birlese shyrqaǵan Gımn áýeni patrıotyq áýezge tunyp turdy.
Keń aýqymda ótken sharada «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Sabyrjan Súleımenov baıandama jasap, táýelsizdik jyldaryndaǵy Qazaqstan Respýblıkasynyń jáne Ulttyq ulannyń jetken jetistikterin aıtyp ótti. Óz sózinde ol: «Táýelsizdik – bizdiń basty qundylyǵymyz, baǵa jetpes baılyǵymyz. Táýelsizdiktiń araıly tańy atqan shaqta áskerı qurylymdar arasynda alǵashqy bolyp İshki ásker, qazirgishe Ulttyq ulan áskeri qurylyp, egemendi eldiń berik qorǵanyna aınaldy. Qazirgi ýaqytta ulandyq jaýyngerler beıbit kúnde de erlikke oryn baryn dáleldedi. Has jaýyngerler Erbol Otarbaev, Jandos Baıanbaev, Syrym Súndetov jáne kúni keshe ǵana Elbasynyń qolynan úshinshi dárejeli «Aıbyn» ordenin alǵan Bahtıar Qaıyrbekov, sonymen qatar «Halyq qaharmany» joǵarǵy memlekettik ataǵyna ıe bolǵan polkovnık Qaırat Úmbetovtyń janqıarlyq erlikteri el esinde. Ulandyq jaýyngerler qashan jáne qaı kezde de bolsyn turaqtylyq pen tynyshtyq ornaǵan «Máńgilik eldiń» máńgilik qorǵaýshysy bola bermek» dep baıandamasyn túıindeı kele, barsha qazaqstandyqtardy tól merekemen tebirene quttyqtady.
«Ońtústik» óńirlik qolbasshylyǵynyń barlyq jeke quramy, Ulttyq ulan ardagerleri jáne áskerı qyzmetshilerdiń otbasy músheleri qatysqan is-shara barysynda Ulttyq ulan Bas qolbasshysynyń jáne «Ońtústik» óńirlik qolbasshylyǵy qolbasshysynyń jeke quramdy kótermeleý týraly buıryqtary oqylyp, jaýyngerlik qyzmet atqarýda úzdik qyrynan kózge túsken áskerı qyzmetshiler gramotalarmen, keýde belgilermen jáne baǵaly syılyqtarmen marapattaldy. Áskerı qyzmetshilerge marapattardy «Ońtústik» óńirlik qolbasshylyǵynyń qolbasshysy general-maıor Álibek Serálıev jeke ózi tabys etti.
Atap óterligi, bul kúni Qazaqstannyń mádenıet qaıratkeri, elge tanymal prodúser, ári ánshi, kompozıtor Arman Dúısenovtiń jetekshiligimen respýblıkalyq «Gúlder» án-bı ansambli ulandyqtarǵa arnap merekelik konsert syılady.
«Elim – deıtin er bolmasa, erim – deıtin el qaıdan bolmaq» demekshi, Qazaqstan Respýblıkasynyń Táýelsizdik jyldaryndaǵy qalyptasýy men nyǵaıýy jolyna, hám qaýipsizdigin qamtamasyz etý men eldiń birligin saqtaý jolyna Ulttyq ulannyń aıbyndy jaýyngerleri qashan da óz úlesterin qosyp keledi jáne de qosa bermek!
