Búgin Astanadaǵy Táýelsizdik saraıynda el Táýelsizdiginiń 25 jyldyǵyna arnalǵan saltanatty shara ótip, onda Elbasy Nursultan Nazarbaev barsha qazaqstandyqtardy bas merekemen quttyqtady.

Jıynǵa qatysqan kórnekti memleket qaıratkerleri, túrli salanyń ókilderi de sóz alyp minbege kóterildi. Bir qyzyǵy Prezıdent Nazarbaev osy shıek ǵasyr ýaqyt ishinde Qazaqstannyń ótken jolyn, jas memlekettiń kez bolǵan qıyndyqtaryn jipke tizip, nebir qıyn belesterdi judyryqtaı jumylǵan halyq birligi arqasynda ótkenin aıtyp, eldik pen egemendiktiń mán-mańyzyna toqtalsa, minberge kóterilgender Elbasyny kózinshe maqtap, osy jyldar ishinde atqarylǵan barlyq sharýalar tek bir kisiniń eńbegi dep kórsetýge tyrysty. Bas partıa jetekshisiniń birinshi orynbasary da, ulttyq rýhanıat janashyry atalyp júrgen vıse-premer de, olardan keıin sóz alǵan sportshy, dárigerler de saltanatty sharany Táýelsizdikke arnalǵan jıyn emes, Elbasynyń týǵan kúni nemese Tuńǵysh Prezıdent kúni dep qabyldap qalsa kerek.

Yńǵaısyzdyqtan jıynnyń sońyna qaraı Elbasynyń ózi qutqardy. Dúıim jurtqa ózine baǵyttalǵan maqtaý men qolpashtaýdyń artyqtaý ketip jatqanyn anyq ańǵartty.

«...Búgin meniń atyma kóp ásire maqtaý sóz aıtyldy. Meniń jasym da, tájirıbem de úlken, sondyqtan mundaı sózder maǵan áser etpeıdi, árıne. Shyn máninde istelgen ister týraly aıtylsa, onda jón, biraq odan artyq aıtylmaýy tıis. Degenmen men barshańyzǵa jyly sózderińiz úshin alǵys aıtamyn. Munyń bári meni bolashaq isterge qanattandyrý úshin aıtylyp jatyr dep esepteımin. Dál qazir men qanattanyp otyrmyn dep sizderdi sendirgim keledi», - dep kúlimsiredi N.Nazarbaev.

Shynymen de, Elbasy eńbegin eskeremiz dep kóp aǵaıyndar asyra siltep jibergeni bul jıynda da anyq baıqaldy. Sol baıandamashylar osy «ásiresheshendigimen» Qazaqstan memlekettiliginiń bastaýynda turǵan tulǵa týraly keri pikir qalyptastyryp alamyz-aý degendi múldem oılamaıtyn sıaqty.

Prezıdentten keıingi bılik basyndaǵy ekinshi tulǵa Toqaev ta qyryn ketkendeı boldy. Jıyn tizginin qolyna alyp, «sheshenderdi» kezek-kezek minberge shaqyryp otyrǵan onyń osy jıyrma bes jyl ishinde qazaqshaǵa áli tili synbaǵan ba dep qaldyq. Onysyn qoıyńyzshy, elden qalmaıyn dep Elbasynyń ádirisine kesek maqtaýlar men áserli teńeýlerin qarsha boratqan partıalyq áriptesi Muhtar Qul-Muhammedti «kóp sóılep kettiń» degendeı minep tastady. Alaıda, Muhtardan keıin minberge kóterilgender Senat spıkeriniń bul eskertýin qystyrǵan da joq. Máselen, vıse-spıker Imanǵalı Tasmaǵambetov Elbasynyń Qazaqstan damýyndaǵy róline toqtala kele, qyzdy-qyzdymen qazaq tarıhyndaǵy 128 han men qaǵannyń HÚ ǵasyrlyq qyzmetinen Nazarbaevtyń 25 jyl ishindegi jumysy asyp túsetinin aıtyp, san soqtyrdy. «San soqtyrdy» deýimiz beker emes, eki apta buryn ǵana jaramsaqtyqtyń jarapazanynan qajyp, Elbasynyń atyn Astanaǵa bereıik degenderdiń «áláýlaıyn» áreń toqtatqanda, el sengen azamattyń myna «shabysy» kimdi bolsa da shamyrqatqany sózsiz. Álde, baıandama kezegi áldebir medısınalyq ortalyqtyń tanyaldaý neırohırýgynan keıin tıgenine shamdanyp turyp, baıqamaı qaldy ma eken Imekeń?!

Alaıda, jıynda sóz alǵandardyń bári ásire maqtaýmen shekteldi deı almaımyz. Máselen, kóp is-sharada kózge túse bermeıtin, birtoǵa qaıratker Qaırat Mámı erlegen sıaqty. Ádettegi sarynmen el damýyn Elbasy esimimen baılanystyra kele, Joǵarǵy sot tóraǵasy Qazaqstannyń ıesi de, kıesi de kim ekenin saraıdaǵylardyń da, jıyndy tóte efırden kórip otyrǵan bylaıǵy jurttyń da esine salarlyq sóz aıtty.

«Respýblıkamyzdyń ıesi de kıesi qazaq ulty da osy ýaqyt ishinde ózgeni elep ekshep, ózin tanyta bildi. Dástúrsizdikke barmady, aǵaıynshyldyqtyń altyn arqaýyn úzbedi, dosty baýyrǵa, baýyrdy táýirge aınaldyrdy. Táýelsizdik týy tóbemizde jelbiregen jıyrma bes jyl ultymyzdyń qanynda memleket qurý qabiletiniń moldyǵyn dáleldedi!». Ne degen sóz?! Jer – qazaqtiki, el – qazaqtiki ekeni ejelden daýsyz másele. Alaıda, sony bıik minberden batyl túrde málimdeýge kóp jerde keritartpalyǵymyz kedergi jasap, «toleranttylyq», «ulttar dostyǵy» degen sıaqty «kezekshi» sózdermen shektelip jatatynymyz da ótirik emes. Sondyqtan da, búgingi jıynda aıtylǵan maqtaýlar men toqtaýsyz jaýǵan odalardyń ishinde ilip alarlyq bir sóz bolsa, ol – osy Qaırat Mámıdiń sózi boldy-aý.

Jomart Abdollauly