Búgin Astanada Qazaqstan Prezıdenti Nursultan Nazarbaevtyń qatysýymen Táýelsizdiktiń 25 jyldyǵyna arnalǵan saltanatty jıyn ótti. Onda QR premer-mınıstriniń orynbasary Imanǵalı Tasmaǵambetov sóz sóılep, Táýelsizdik týraly óz oı-tolǵamyn erekshe tebirenispen jetkizdi. Bul týraly QR premer-mınıstri orynbasarynyń baspasóz qyzmeti habar taratty.
"Iá, adam úshin alańsyz ómir bir baqyt bolsa, halyq úshin táýelsiz bolý - myń baqyt! Al "baqyt" degenimiz oryndalǵan aq arman. Ashyǵyn aıtý kerek. Bul jolǵy baq - bizdiń mańdaıymyzǵa buryn-sońdy qonbaǵan baq. Oǵan osynaý saıyn dalamyzdyń kózi, áz atalarymyzdyń sózi, aqbas tarıhtyń ózi kýá. Óz aldyna el bolamyn degen halqymyzdyń sonaý Túrki qaǵanatynan jalǵasqan 15 ǵasyrlyq tamyry, 1500 jyldyq ǵumyry kýá", - dedi Imanǵalı Tasmaǵambetov.
Sondaı-aq, Imanǵalı Tasmaǵambetov VI ǵasyrdaǵy Kók túrkiler zamanynan beri Uly Dalada izi qalǵan qaǵanattar men handyqtardy 128 qaǵan men han bılegenin aıta kele, olardyń eshqaısysy eliniń shekarasyn shegeleı almaǵanyn aıtty.
"Eshqaısysy eline qaýip tónbeıtindeı etip, bárimen kelisim jasaı alǵan joq. Eshqaısysy elinde qoı ústine boztorǵaı jumyrtqalaǵan beıbit zaman ornatyp, tatýlyqqa uıyta alǵan joq. Eshqaısysy memleketin álemniń alty qurlyǵyna birdeı moıyndata alǵan joq. Eshqaısysy barsha adamzat balasyn ymyraǵa shaqyryp, kelisim sózin júrgize alǵan joq. Eshqaısysy eshqashan myzǵymas astanasyn sala alǵan joq. Al, Elbasy Nursultan Nazarbaev osynyń bárin bir ózi jasady", - dedi vıse-premer Táýelsizdiktiń 25 jyldyǵyna arnalǵan saltanatty jıynda sóılegen sózinde.
Sonymen qatar, QR Táýelsizdiginiń 25 jyldyǵyna arnalǵan saltanatty jıynda vıse-premer Imanǵalı Tasmaǵambetov sóz sóılep, halyqty eldiń birligi men beıbit tirligin saqtaýǵa úndedi.
"Mundaı dáýirli oı men dúbirli isterdiń túbinde bir ǵana bólek dúnıe - árbir qazaq kúni-túni qaperinen shyǵarmaı, ishteı táýbe etetin, Elbasymyz ár sózinen tastamaı, aıtyp júretin uly qundylyq jatyr. Ol - eldiń amandyǵy. Birligi men búgingi beıbit tirligi. Berekesi men yrysy", - dep sózin jalǵastyrdy vıse-premer Imanǵalı Tasmaǵambetov.
Bul rette Imanǵalı Tasmaǵambetov keshegi keńestik júıe qırap, baýyrlas elderimizdiń basyna túsken qıyn zamandardan mysal keltirdi.
"Ferǵana men Osh ultaralyq qaqtyǵystarynyń nátıjesi -1500 ólim, 10 myń múgedek, 35 myń bosqyn; Abhaz-grýzın soǵysy - 9 myń ólim, 10 myń múgedek, 300 myń bosqyn; Qarabaq soǵysy - 30 myń ólim, 150 myń múgedek, 1 mıllıon bosqyn; Tájikstandaǵy azamattyq soǵys - 60 myń ólim, 280 myń múgedek, 1,5 mıllıon bosqyn. Bul jáı ǵana sandar emes. Tatýlyqtyń tamyryn,yntymaqtyń yrysyn, beıbitshiliktiń qadirin biletin taǵdyrlar", - dep aıtty vıse-premer QR Táýelsizdiginiń 25 jyldyǵyna arnalǵan saltanatty jıynda.
Condaı-aq, QR Táýelsizdiginiń 25 jyldyǵyna arnalǵan saltanatty jıynda sóz sóılegen QR Premer-Mınıstriniń orynbasary Imanǵalı Tasmaǵambetov eldiń amandyǵy, beıbitshilik týraly aıta kele, AQSH-tyń 34-shi Prezıdenti Dýaıt Eızenhaýerdiń soǵys týraly aıtqan sózin mysalǵa keltirdi.
"Eki birdeı dúnıejúzilik soǵysqa qatysqan, AQSH-tyń 34-shi Prezıdenti Dýaıt Eızenhaýer: "Qansha ádiletti bolsa da, eshqandaı soǵys balanyń bir tamshy ashshy jasy men ananyń bir tal aǵarǵan shashyna tatymaıdy. Soǵysý óner emes, al soǵysta jeńý erlik emes. Naǵyz erlik pen dańq - qarapaıym halyqtyń mańdaı teri - eńbeginde. Tarıhtyń shynaıy qoshametine de sol eldi eńbekke baýlyp, tabysqa jetelegen Tulǵa ǵana laıyq!" degen eken", - dedi vıse-premer birlik pen beıbitshilik mańyzyn basa aıta otyryp.
