Shymkentte bas shyrshanyń shamy jaǵyldy. Jańa jyldyń basty sımvolyn ornatý men shahardy bezendirýge bıyl da qazynadan bir tıyn da qarastyrylmaǵan. Qala ákimdigi ol qarjyny áleýmettik jaǵdaıy tómen otbasydan shyqqan jáne jetim balalarǵa úlestirip berdi, dep habarlaıdy nur.kz
Bıyl Shymkenttegi ál-Farabı alańyndaǵy bas shyrshanyń shamyn qala basshysy emes, Ońtústik Qazaqstan oblysynyń ákimi Janseıit Túımebaevtyń ózi jaqty. Saltanatty sharada sóz sóılegen aımaq basshysy shırek ǵasyrda táýelsizdik jyldar ishinde Qazaqstan jetken jetistikterdi de sóz etýdi umytpady. Tipti búkil álem Qazaqstandy moıyndaǵanyn da maqtanyshpen málim etti.
«Táýelsiz elimizdegi osyndaı keshter, merekeler, túrli sharalar kóp bola bersin. Minekı, ózderińizben de dúnıeni aınalyp, jańa jyldy qarsy alýǵa aralaryńyzǵa kelip otyrmyz. Ózderińizben birge kelesi jyly kóptegen jumystardy atqaramyz degen josparymyz bar. Onyń shet jaǵyn aıtyp jatyrmyz, qalǵan jaǵyn ózderińizben aqyldasamyz... Álem – bizdiń ortaq úıimiz. Shırek ǵasyr ishinde Qazaqstanymyzdy álem moıyndady. Munyń bári elbasymyzdyń arqasynda. Jańa jyldy qarsy alýǵa az ǵana ýaqyt qaldy. Barlyqtaryńyzdyń otbasylaryńyzǵa, jaqyndaryńyzǵa baqyt, sáttilik, densaýlyq tileımin», - dedi quttyqtaý sózinde Túımebaev.
Munan soń oblys ákimi bas shyrshanyń shamyn jaǵyp, Shymkent ákimi Ǵabıdolla Ábdirahymov ekeýi sharaǵa qatysýshylarmen birge shyrshany aınaldy.
Merekelik shara saltanatty otshashýǵa ulasty.
Eske salsaq, byltyr Shymkentte qalany jańa jyldyq bezendirýge 80 mln teńge qaralyp, keıinnen ol qarjy áleýmettik jaǵdaıy tómen jáne ata-ana qamqorlyǵynsyz qalǵan balalarǵa qystyq kıim alýy úshin esepshottaryna aýdaryldy.
Bıyl da jergilikti bılik bul qaıyrymdylyq sharasyn umytpady. Iaǵnı, áleýmettik turǵydan az qamtylǵan otbasydan shyqqan jáne jetim 804 bala qarjylaı syılyq aldy.
Olardyń árqaısysyna 20 aılyq-eseptik kórsetkish kóleminde, ıaǵnı, 42 myń teńgeden aýdaryldy. Al ál-Farabı alańyna ótken jyldan qalǵan bıiktigi 18 metrdi quraıtyn shyrsha ornatyldy. Qalany bezendirýge jergilikti kásipkerler demeýshilik jasaǵan.
