Esterińizge sala ketsek, 17 jeltoqsan kúni «Qamshy» portalynda Álı Oqapov pen Qaırat Nurtasqa baǵyttalǵan Maral esimdi qazaq qyzynyń haty jarıalanǵan bolatyn. Hatta Álı men Qaırattyń «Daryn» memlekettik syılyǵynyń ıegeri atanǵany jaıly aıtylyp, ánshilerge «Ózderińizdi alǵan orden-medaldaryńyzǵa laıyqpyn dep sanaısyzdar ma?» degen saýal qoıylǵan. Osy suraqqa ánshilerdiń óz aýzynan jaýap alý maqsatynda «Qamshy» tilshisi telefon arqyly olarǵa habarlasyp edi, alaıda birden jaýap alý múmkin bolmady. Araǵa bir apta salyp, tilshimiz olarǵa qaıta habarlasyp, atalǵan hatqa baılanysty jaýabyn bilmek boldy. Hatta aty atalǵan ánshilerdiń biri – Qaırat Nurtastyń dırektory Laýra hanym: «21 jeltoqsan kúni ótken konserttiń esebin jasap otyrǵandyqtan, qazir jaýap berýge múmkinshiligim joq», - dep sebebin túsindirse, Álı Oqapovtyń tilshimizge bergen jaýaby múldem basqasha boldy.

«Ne sebepti maǵan tikeleı habarlasyp otyrsyz, ártistiń jeke nomerine habarlasýǵa eshkimniń de quqy joq», - dep áı-sháı joq, osylaı bastady áńgimesin Álı Oqapov. «Men tórt kún boıy uıyqtaǵanym joq, sizge de tún ortasynda, uıyqtap jatqan jerińizde habarlassa ashýyńyz keledi ǵoı... Men sizderdiń qandaı hat boıynsha habarlasyp turǵandaryńyzdy bilemin, ony oqyp shyqtym. Alaıda, men oǵan jaýap berýge mindetti emespin. Hat bolsa, hat kúıinde qalsyn. Bul meniń eshqandaı da tákapparlyq nemese bireýdi mensinbegendigim emes, maǵan qoıylǵan suraqtardyń barlyǵyna jaýap berip otyratyn meniń múmkindigim joq. Mundaı tirliktermen aınalysatyn meniń arnaıy adamym bar, osyndaı jaǵdaılardy sheship otyrsyn dep saılap qoıǵanmyn. Nege sol kisige habarlaspaısyzdar?» - dep ashýlana ketti.

Álıdiń aıtyp otyrǵany, onyń dırektory – Erlan Álimov. Negizinde eń birinshi kezekte dál sol Erlanǵa baılanysqa shyqqan edik. Erlanmen bir ret emes, birneshe ret tildestik. Atalmysh suraqqa baılanysty Erlannyń aıtqan jaýaby mynadaı boldy: «Bul hat Álıge tikeleı arnalǵan hat eken, mundaǵy qoıylǵan suraqqa men jaýap bere almaımyn. Álıdiń ózine habarlasyp, jaýabyn ózinen alyńyzdar».

Mine jaqynda ǵana «Daryn» syılyǵynyń ıegeri atanǵan Álı Oqapovtyń jaýaby osylaı boldy. Al, taǵy bir «Daryndy» ánshi, «Qurmet» ordeniniń ıegeri Qaırat Nurtastyń  jaýabyn kelesi aptada «Qamshy» portalynan oqıtyn bolasyzdar.

Qamshyger: Nazerke Labıhan