Almaty oblysy ákiminiń orynbasary Jaksylyq Omardyń tóraǵalyǵymen óńir jastarynyń kezekti keńesi ótti. Jetisý jeriniń ár tarabynan jıylǵan jastar oblystyq jastar saıasaty basqarmasynyń jyldyq qorytyndysyn shyǵaryp, keler jylǵa jospar qurdy dep xabarlaıdy óńirdegi tilshimiz. Jıyn Almaty oblysynyń jastar saıasaty máseleleri boıynsha basqarma basshysy Aıdyn Nurmuxambettiń baıandamasynan bastaldy. Esepti kezeńde atqarylǵan sharalardy tizbektep ótken basqarma basshysy ózekti máselelelerdiń de basyn ashty. Olardyń qatarynda jastardyń óz-ózine qol jumsaý derekterimen óskeleń urpaqtyń zańdy belden basý faktileri aıtyldy.

Atalǵan máselelerdi nazarǵa alǵan oblys ákiminiń orynbasary Jaksylyq Omar óńirdegi jastar saıasatyna tyń kózqaras pen jańa bastamalar qajet ekendigin alǵa tartty.

"Aımaqta dúrkirep ótetin sharalardyń bolǵany artyq emes. Degenmen, bul jastar saıasatynyń basty mindeti dep aıtýǵa kelmeıdi. Jastar arasynda qylmystyń órshýi ári óz ózine qol jumsaýy osynyń aıqyn kórsetkishi. Sondyqtan, bul baǵyttaǵy jumysty jańǵyrtý qajet. Osy oraıda, atalǵan máselege qatysty arnaıy jumys tobyn quryp, aýqymdy analız jasalý kerek. Anyqtalǵan ótkir máseleler negzinde "Jastar joly" dep atalatyn qujat ázirlenýi tıis. Qujatta birinshi kezekte aýyl jastarynyń máselelerin tarqatý basty nazarǵ qoıylýy mindet. Ekinshi kezekte jastardyń jumyssyzdyǵyn joıý. Úshinshiden – jastardyń bos ýaqytyn tıimdi paıdalanýyna jol ashý. Tórtinshiden, óskeleń urpaq arasyndaǵy qylmysty aldyn alý jáne besinshi kezekte múmkindigi shekteýli jastardy áleýmettendirý syndy máseleler kóterilý qajet", – dep, naqty tapsyrmalardy júktegen oblys ákiminiń orynbasary atalǵan jumysqa jastardy atsalysýǵa shaqyrdy.

Óz kezeginde aımaqtardan jıylǵan jastar bastamany biraýyzdan quptap, qoldaýlaryn jetkizdi.

Shara sońynda aımaq alamandary atqarylǵan jumystaryna saı marapattalyp, baǵaly syılyqtarǵa ıe boldy.