RF Qorǵanys mınıstrliginiń ushaǵy jeksenbide, 25 jeltoqsanda tańǵy ýaqytta apatqa ushyrady. Laınerdiń bortynda 92 adam bolǵan. Olardyń ishinde, Aleksandrov atyndaǵy ansámbldiń 68 mýzykanty, BAQ-tardyń 9 ókili ("Zvezda" telearnasy, NTV jáne Pervyı kanal), alyp kele jatqan 6 adam jáne ekıpajdyń 8 múshesi bar.
RIA Novostı málimetinshe, Tý-154 ushyp shyqqannan keıin jeti mınýt ótkende apatqa ushyraǵan. Ushaq Qara teńizdiń Anapa jaǵalaýyna jaqyn mańda qulaǵan. Laınerdiń qırandysy bir jarym shaqyrymǵa shashylǵan, olar 50-100 metr tereńdikte. Osyǵan baılanysty 26 jeltoqsan - Reseıde jalpyulttyq qaraly kún bolyp jarıalandy.
QR Prezıdenti Nursultan Nazarbaev RF Prezıdenti Vladımır Pýtınge TÝ-154 ushaǵynyń qulaýyna baılanysty kóńil aıtty. «Qazaqstan Prezıdenti Reseı Federasıasynyń Qorǵanys mınıstrligi ushaǵynyń Sochı qalasy mańynda apatqa ushyraýy saldarynan Reseı azamattarynyń qaza bolǵany týraly qaıǵyly habardy zor kúızelispen qabyldady», dep habarlady Aqordanyń baspasóz qyzmeti. Sondaı-aq, habarlamada «Nursultan Nazarbaev qaıǵyǵa ortaqtasyp, Qazaqstan halqynyń jáne jeke óziniń atynan qaza bolǵandardyń týystary men jaqyndaryna, sondaı-aq barsha Reseı halqyna kóńil aıtty» dep jazylǵan.
Búgin, Qara teńizdegi Tý-154 ushaǵynan opat bolǵan 11 adamnyń máıiti qutqarý kemesiniń bortyna shyǵaryldy, dep habarlady "Interfaks» Reseı Qorǵanys mınıstrligine silteme jasap. İzdeý jumystary jalǵasyp jatyr. Tý-154 apatqa ushyraǵan jerdegi súńgýirler tobynyń sany 109 adamǵa deıin kóbeıdi, ushaqtyń fúzelájin jáne iri synyqtaryn izdeý úshin sýǵa túsirý bastaldy. RF Qorǵanys mınıstrliginiń habarlaýynsha, VTA ushaǵymen ushqyshsyz basqarylatyn "Orlan-10" jetkizilgen. Ol taıaý ýaqytta áýeden sý astyndaǵy jaǵdaı jóninde monıtorıń júrgizýge kirisedi.
Keshe, Almatylyqtar Tý-154 ushaǵynyń apatqa ushyrap, qaza tapqandardy eske alý úshin Reseı konsýldyǵyna gúl qoıǵan bolatyn.
