Talanatty fototilshi Sársenbek Qyzaıbekuly 1980 jyly 13sáýirde dúnıe esigin ashty. Kindik kesken jeri asqary aspanmen tildesken Hantáńiriniń  arǵy betinde, has batyr Qabanbaı men tulpary tynyqqan Attyń taýy. Kıeli ólkeniń izdenimpaz perzenti pektep qabyrǵasynda júrgende-aq foto óneriniń tizginen jabysyp, jalynan ustap, qamshylandy. Tyrnaq aldy  týyndylary ólkelik, oblysytyq «Shyńjań gazeti», «İle órenderi» gazetterinde jaryq kórdi, ózi «Órender» gazetiniń «tańdaýly tilshisi» ataǵyna ıe boldy. Sársenbektiń avtorlyǵymen jaryq kórgen sýretti habarlar oblys, aýdan deńgeıindegi basylymdar men basqada mekemeler tarapynan joǵary baǵalanyp, marapattaldy.

 Atajurqa at basyn birjola burýdy armandaǵan ónerli azamat 2001 jyly otanǵa oraldy. Ol óz ómirindegi eń bıik maqsatyna 2003 jyly qol jetkizip, T.Júrgenov atyndaǵy Qazaq ulttyq óner akademıasyna «Kıno jáne televızá operatory» mamandyǵyna qabyldanyp, 2007 jyly tamamdady. Stýdent shaǵynda boıda bar ónerin odan ary shyńdaı tústi, sonyń nátıjesinde Túrkıadan úsh tilde jaryq kórgen «Qazanat» atty fotokitaptiń basym kóp sandy sýretterin túsirip, qalyń jurttyń kózaıymyna aınalýyna eseli eńbek sińirdi. «Qyran» federasıasy shyǵarǵan «Qazaq qusbegileri» atty sýretti kitapqa da kóptegen kórkem týyndylary engizildi.

 Akademıa qabyrǵasynda bilimin jetildire júrip «Almyty – meniń súıikti qalam» atty fototilishler baıqaýynyń úsh dúrkin jeńimpazy atandy, osylaısha ol ásem qalamyzdyń aıshyqty ajaryn barshaǵa pash etti. Sársenbek eńbek jolyn 2004 jyly halyqaralyq «Qazaq eli» gazetinen bastady, ilgerindi-keıindi «Juldyzdar otbasy», «Aqıqat» qatarly jýrnaldarda kásibı sheberligin kórsete bildi. 2008 jyldan beri «Almaty aqshamy» gazetinde fototilshi qyzmetin atqaryp keledi. Gazet jumysynyń sapalyq deńgeıin kóterýge aıanbaı úles qosyp kele jatqan Sársenbektiń qol jetkizgen jetistikteri de az emes. Birneshe fotobaıqaýlardyń jeńimpazy, respýblıkalyq basylymdarda úzbeı úzdik týyndylary jaryq kórýmen qatar, úsh tilde daıyndalǵan etnografıalyq «Búrkit» fotokitapqa da birqatar sýretteri endi. El táýelsizdiginiń 20 jyldyǵy qarsańynda ótkizilgen «Táýelsizdik taǵylymy» atty halyqaralyq fotokórmege 20 ǵa tarta sýreti qoıylyp, kórmen nazaryna usynylyp, alǵysyna ıe boldy. Armany asqaq, talaby taýdaı talǵampaz fototilshiniń alda alar asýy men baǵyndyrar bıigi, jeter jetistiginiń mol ekenine senimdimiz. Qazaq fotoóneriniń jańa qyrynan jandanýyna úles qosýǵa nıettengen azamatqa sáttilik tileımiz!!!