Mánshúk Mámetovanyń hıkaıasy sátti aıaqtaldy dep habarlaıdy rikatv.kz. Kóktemde dárethana shuńqyrynan tabylǵan sábıdi aqtóbelik erli-zaıypty asyrap alǵan. "Úmit" sábıler úıinde Mánshúk Mámetovanyń qujattary ǵana qaldy. Qyz bala 12-mamyrda týylyp, 25-de osynda ákelingen bolatyn. Týǵan kezde óz anasyna kerek bolmaı, dárethananyń shuńqyryna tastalǵan, nájistiń arasynda jatyp, ómir úshin kúresken qaısar qyzdyń oqıǵasy qýanyshpen aıaqtaldy. Sábıdi qarashanyń 14-de aqtóbelik erli-zaıypty baýyryna basqan. Mánshúkti asyrap alǵan otbasy týraly eshteńe aıtylmaıdy. Málimet qupıa sanalady. Belgilisi, bul januıanyń jaǵdaıy jaqsy. Bala alý kezeginde tórt jyldaı turǵan. Al, Mánshúkti alǵan soń, aty-jónin ózgertken. Mánshúk keterden eki kún buryn sábıler úıine taǵy bir qyz ákelingen. Zaınýra Isokovany Mártóktegi keden beketinde kedenshiler tapqan. Anasy Ózbekstan eliniń azamaty. Sharanany "Máskeý-Tashkent" poıyzynda týyp, óldige sanap, paketke orap tastap ketken. Kókek-ana kóp uzamaı ustaldy. Biraq, ol óz balasynan bas tartty. Zaınýranyń deni saý, sábıler úıinde tárbıelenip jatyr. Jyl basynan beri "Úmitten" 6 bala asyrap alynǵan. Bireýin Ispanıa azamattary áketti. Alty búldirshin qamqorlyqqa berilse, úsheýi patronattyq tárbıege alyndy. Qazir sábıler úıinde 60 bóbek bar.