Qytaıdyń Sychýan ólkesindegi úlken pandalardy zerttep, qorǵaıtyn ortalyqtyń qyzmetkerine panda shabýyl jasaǵan dep habarlaıdy ria.ru. 
Oqıǵa 17 jeltoqsanda Tántaı taýlaryndaǵy pandalarǵa arnalǵan jattyqtyrý zalynda boldy.  Onda aıýlardy erkindikke jibermes buryn soǵan arnaıy daıyndaıdy. Alaıda bolǵan jáıt týraly endi ǵana belgili boldy. 
Ortalyqtyń 41 jasar qyzmetkeri 16 jastaǵy Sımeı atty urǵashy pandamen bir volerde bolǵan. Kenetten janýar adamǵa shabýyl jasady. Ony tistep, jermen súırep ala júgirgen. Tótenshe jaǵdaı jattyqtyrý baǵdarlamasynyń aıasynda panda balasyn izdep júrgen kezde bolǵan. 
Qazir er adam aýrýhanada jatyr. Onyń jaǵdaıy turaqty. Pandanyń shabýyly saldarynan eki bilegi synǵan, aıaǵyndaǵy sińiri úzilip, denesine túrli jaraqat túsken. 
«Men pandanyń qarny ash boldy ma álde menimen osylaısha oınady ma? Bilmeımin...» deıdi ortalyq qyzmetkeri. 
«Men ony keshirdim. Men bul salanyń mamanymyn. Sondyqtan janýarlardyń qandaı áreketke baratynyn jaqsy bilemin» deıdi ol. 
Budan buryn Qytaıdyń halyqaralyq radıosynda, bılik pandalardyń  sanyn 2025 jylǵa qaraı 18% ósirýdi josparlap otyrǵanyn aıtqan. Qazir Qytaı ormandarynda 1864 panda bar. 422 janýar arnaıy uryqtandyratyn ortalyqta ustalady. 
Úlken panda joıylyp bara jatqan janýar túrine jatqandyqtan, Qytaı ony óz qorǵanysyna alǵan. Aıýlardy túrli elderge jiberý dástúrge aınalǵandaı. Ony jıi «pandalar dıplomatısá» dep atap ketti.