Qaraǵandy oblysy Shahan kentindegi tótenshe jaǵdaıdyń sebebi aıtyldy. Al qutqarýshylar qırandy astynan tiri qalǵan er adamdy shyǵaryp aldy.
Úıdiń jylý qazandyǵynyń jarylýy turǵyn úıdiń qulaýyna sebep boldy. Bul týraly Qaraǵandy oblysynyń ákimi Nurmuhambet Ábdibekov habarlady.
«Turǵyn úı qazandyqtyń jarylýynan qulaǵan. Shahandaǵy birqatar turǵyn úılerge jylý avtonomdyq júıe arqyly beriledi. Bul qazandyq úı komıtetiniń esebinde boldy», - deıdi Nurmuhambet Ábdibekov jýrnalıserge bergen suhbatynda.
Qulaǵan úıge qatysty qylmystyq is qozǵaldy. Muny Qaraǵandy oblystyq İİD baspasóz qyzmeti habarlady. QR Qylmystyq kodeksine sáıkes 292 babtyń 3 tarmaǵy boıynsha (Adam ólimine ákep soqtyrǵan órt qaýipsizdigi talaptaryn buzý) sotqa deıingi tekserý jumystary júrgiziledi.
Qaraǵandy oblysy Shahan kentinde opyrylyp túsken kóp qabatty úıde 118 adam turady. Al úı qulaǵan ýaqytta onda 30-ǵa jýyq adam bolǵan. Baspanasyz qalǵandarǵa ýaqytsha balabaqshada turýǵa ruqsat etildi.
1 qańtar saǵat 22.40-ta Qaraǵandy oblysy Shahtınsk qalasynyń Shahan aýylynda kóp qabatty úıdiń bir bóligi opyrylyp túsken bolatyn.
