Venesýelanyń Joǵarǵy soty opozısıalyq ulttyq assambleıasy Nıkolas Madýrony prezıdent qyzmetinen bosata alatyn ókilettiligi joq dep habarlaıdy ria.ru.

Parlament Madýronyń óz mindetin oryndaı almaǵany úshin prezıdent qyzmetinen ketti dep habarlaǵan. Ol úshin 106 depýtat daýys berdi.

«Konstıtýsıanyń 336 babyna sáıkes depýtattarǵa respýblıka prezıdentiniń saıası jaýapkershiligi týrasynda prosesti habarlaýdy jáne depýtattardyń konstıtýsıalyq ýákilettiligine jatpaıtyn aktterdi qabyldaýdy doǵarýǵa buıryq kelgen» dep sottyń málimdemesinde kórsetilgen.

Venesýelanyń 1999 jyly qabyldanǵan konstıtýsıasyna sáıkes,  memleket basshysyna qatysty ımpıchment qabyldanbaıdy. Desek te, eldegi zańnyń 222 men 232 baptaryna sáıkes atqarýshy bılikti parlament baqylaı alady dep kórsetilgen. Sonymen qatar olar memlekettik qaıratkerlerdiń áreketine baılanysty «saıası jaýapkershilikke» tarta alady jáne qaıtys bolǵanda, halyq prezıdenttiń ornynan ketýin talap etkende nemese ulttyq assambleıanyń sheshimimen qyzmetinen ketken jaǵdaıda prezıdent «absolútti túrde joq» dep tanylady.

Venesýeladaǵy daǵdarys bir jyl buryn qurylǵan opozısıalyq parlamenttiń paıda bolýymen kúsheıe tústi. Qazir zań shyǵarýshy men atqarýshy bıliktiń arasynda áriptestik joq. Madýro opozısıany «parlamentte tóńkeris» jasaýǵa talpynyp júr dep aıyptady. Al parlament memleket basshysy tarapynan konstıtýsıany buzyp otyrǵanyn alǵa tartady.

Joǵary sot buǵan deıin opozısıalyq parlamenttiń prezıdentke ımpıchment daıyndaýdy doǵarý týraly úkim shyǵarǵan.