Baǵlan Maılybaev 2 aı merzimge qamaýǵa alyndy. Bul týraly Qazaqstan Respýblıkasynyń UQK baspasóz qyzmeti habarlady.

"2017 jylǵy 12 qańtarda Qazaqstan Respýblıkasynyń Ulttyq qaýipsizdik komıteti Qazaqstan Respýblıkasy Qylmystyq kodeksi 185-baby 1, 3-bóliginde kózdelgen («Memlekettik qupıalardy zańsyz jınaý, taratý, jarıa etý») qylmystardy jasady degen kúdikpen QR Prezıdenti Ákimshiliginiń qyzmetkerleri bolǵan B. Maılybaev jáne  N. Galıhın ustaldy" delingen habarlamada.

14 qańtarda Astana qalasy, Esil aýdandyq soty 2 aı merzimge qamaýǵa alý sanksıasyn berdi. Atalǵan tulǵalar Qazaqstan Respýblıkasy Qylmystyq-prosestik kodeksiniń 128-babyna sáıkes UQK Tergeý ızolátoryna qamaýǵa alyndy. Kúdiktilerdiń jáne olardyń týystarynyń turǵylyqty jerleri boıynsha tintýler júrgizildi, zattaı dáleldemeler alyndy. Tergeý áli de jalǵasýda. 

Maılybaev prezıdent ákimshiliginiń burynǵy basshy orynbasary qyzmetinde alty jyl boıy bolǵan.

12 qańtar kúni ol prezıdenttiń jarlyǵymen qyzmetinen bosatyldy. Ornyna Reseıde elshilik qyzmet atqarǵan Marat Tájın taǵaıyndalǵan edi.