«Qamshy» portalyna Qytaıdan Álimbek Nuǵyman(aty-jóni ózgertilip alyndy) esimdi etnıkalyq qazaq habarlasty. Ol Gýan Djoý qalasynda turady. Kásipkerlikpen aınalysatyn Álimbek óz basyndaǵy máselesin bylaı dep túsindiredi:
«Bul hatty jaza otyryp, bir emes jıi qaıtalana bergen Qytaıdyń jónsiz tekseristerine shaǵymdanamyn. Reseıdegi klıentterimniń tapsyrysymen Shanduń qalasyna barǵanmyn. Ushaqpen jetip, ary qaraı júrdek poıyzben ónerkásiptik qalalardy araladym. Sonda meni árbir áýejaıda, ár bir poıyz beketinde «Shyńjańnyń qazaǵy» dep tergedi. Pasportym, qujatym bári durys bolsa da, joǵary jaqtan buıryq bar dep teksere beredi. Olarǵa «men de sendermen teń quqyly Qytaı azamatymyn, nege teksere beresińder» desem de sebebin túsindirmeıdi. Joǵary jaǵynyń buıryǵymen de tanystyrmaıdy.
Kúni keshe ǵana, 3 kúnniń aldynda keshqurym ınternet klýbta otyrǵanmyn. 8 qytaı keldi de jeke kýáligimdi tekserip, sebebin aıtpastan polısıa bólimshesine alyp ketip, tańǵy 8-ge deıin qamaýda ustady. «Mal urlap, kisi óltirgen» aıybym bolmasa da sýretke túsirip, barmaq izimdi kúshpen aldy. Telefonymdy alyp, túgel aqtaryp, olardyń zańsyz tekserisin túsirip alǵan sýretterim men beınejazbany óshirip tastady. Bul jaǵdaı meniń ǵana basymda emes, Shyńjańnan, İshki Monǵoldan barǵan ulty qytaı emes Qytaı azamattarynyń báriniń basyna kelip jatyr. Bárimizge de terrorıst sıaqty qaraıdy. Bul Qytaıda dáripteletin «56 ulttyń buzylmas yntymaǵyna» qytaılardyń óz qolymen syzat túsirip otyrǵanynyń aıǵaǵy. Men qazaqtyń balasy retinde Qazaqstan bıliginen, prezıdentinen sheteldegi qandastarǵa arasha bolsa dep suraımyn. Pýtınniń Ýkraınadaǵy orystarǵa arasha túskeni sıaqty bizdi de qoldasa deımin. Osy máseleni Qazaqstandaǵy barlyq aqparat quraldaryna, 12 mıllıon qandas baýyrlaryma aıtamyn.
Qytaıda qytaılar ózderinen basqa ult azamattaryn adam qataryna qospaı otyr. Biz eshqandaı qylmys istemesek te, adal kásippen shuǵyldanyp júrsek te bitpeıtin tekseris jasaı beredi. Biz de zańdy qytaı qalaı biledi, sol deńgeıde bilemiz ǵoı. Quqyǵymyzdy qorǵaı alamyz. Biz, ıaǵnı ulty qytaı emes ulttar Qytaıdyń shyǵysyndaǵy, teńiz jaǵalaýyndaǵy qalalarda erkin júrip tura almaımyz. Batys óńirge qaraǵanda damyǵan Shyǵys Qytaı bizge jabyq. Al, Qytaılar Shyńjańǵa alshańdap kiredi. Eshqandaı qujatsyz Shyńjańda júredi, tipti qujatsyz ushaqqa bılet alǵandardy da kórdim.
Qonaqúıge jatsaq túngi úshte kelip tekseredi turǵyzyp alyp. Qarsylyq kórsetsek sen zań adamyn syılamadyń dep basyńa «qalpaqty» kıgizedi. Óz quqyǵymdy talap etip, bastyqtarymen jolyqtyrýdy ótinemin. Ujdany barlar keziktiredi, bastyqtary ylǵı da «túsinbestik boldy, joǵarydan buıryq solaı edi» dep qutylady. Qytaı ishinde vokzaldarda, jolaýshylar beketterinde qujat túgili bir japyraq qaǵazsyz jóńkile kóship júrgen «sanaqta joq» myńdaǵan qytaı bar. Olarǵa máý demeıdi de, bizdi malsha tekseredi. Bul shynyn aıtqanda Qytaıdyń fashısik saıasaty. Qytaıǵa Amerıkanyń da sózi batpaı otyr. Qazaqstannyń dıplomattary Qytaıdaǵy qazaqtarǵa ara túsip, Qytaı bıliginiń basqynshyl saıasatyna tosqaýyl bolsa eken!»
