Ystambuldaǵy túngi klýbqa jańa jyl túninde shabýyl jasap, 39 adamdy óltirgen Ózbekstannyń týmasy tergeý barysynda shabýyldaıtyn jer kezdeısoq tańdalǵanyn aıtyp berdi dep habarlaıdy bbc.com.

Polısıa tergeýi barysynda Abdýlkadır Masharıpovtyń sırıalyq Rakka qalasynan nuqsqaýlyqtar alyp otyrǵany belgili boldy. Rakka – DAISH-tiń basty dińgegi bolyp tabylady.

«Men Taksım alańyna keldim. Ol jerde qaýipsizdik sharalary qatań saqtalǵandyqtan onda shabýyl jasaı almadym. Basqa jer izdeý týraly tapsyrma aldym. Reina túngi klýby maǵan óte yńǵaıly kórindi. Ol jerde kúsheıtilgen kúzet bolmady» deıdi Masharıpov.

Abdýlkadır Masharıpovtyń ustalǵany týraly 17 qańtarda begili boldy. Dál sol kúni túrik BAQ-ta kıiminde qannyń izi bar, qysqa jeıde kıgen, beti kógergen er adamnyń fotosy shyqty.

Ystambul gýbernatory Vasıp Shahın Ózbekstan azamatynyń Túrkıaǵa 2016 jyldyń qańtar aıynda zańsyz kelgenin habarlady.

Gýbernatordyń aıtýynsha, Masharıpov joǵary bilimdi, Aýǵanstan men Pákistanda kúshti daıyndyqtan ótken jáne Sırıadaǵy DAISH terorıstik tobymen baılanysta bolǵan.

Qarýlanǵan er adam Reina túngi klýbyna taksımen kelip, jańa jyldy toılap jatqan adamdarǵa oq jaýdyrǵan. Kóz jumǵan 39 adamnyń kóbi sheteldikter. Ondaǵan adam jaralandy.