Bul týraly keshe, 19 qańtarda aımaq basshysy Nurlan Noǵaevtyń Jylyoı aýdanyna jumys sapary kezinde belgili boldy. Sapar barysynda aımaq basshysy májilis ótkizip, oblystaǵy jylý berý maýsymynyń barysyn talqylady. Jıynǵa oblystyń komýnaldyq sharýashylyǵyna jaýapty qyzmetkerler qatysty.

Májiliste oblys turǵyndarynyń jeke qazandyqtardy qaýipsizdik erejelerin saqtamaı paıdalanyp otyrǵany sóz boldy. Máselen, Jylyoı aýdanynda jeke qazandyqtyń 1858 páterde jaǵylyp otyrǵany, biraq solardyń 50-iniń ǵana qaýipsiz ekeni aıtyldy. Mundaı jaýapsyzdyqtyń saldarynan byltyr oblysta 41 adam gazdan ýlanyp, bir kisi qaza bolǵan. 

Ár aýdan erekshelikterin eskerip máseleni retteýdiń ózinshe joldaryn usyndy. Máselen, Jylyoı aýdanynyń Ákimi turǵyndardan erejeni saqtaýdy talap etemiz, bolmasa olardy ortalyq jylý júıesine qosamyz dese, Mahambet aýdany Ákimdigi máseleni bir top páterge ortaq qazandyq ornatý arqyly retteımiz dedi.

Májiliste aıtylǵan taǵy bir másele turǵyndardyń qazandyqtaryn teksertýden qashatyndyǵy boldy.

"Atyraý qalasyndaǵy Balyqshy aýdanynda turǵyndardyń kóbi artyq jumystan qashyp, esikterin ashpaıdy. Sol sebepti, qazandyqtardy tolyq tekserip shyǵa almaı otyrmyz", - dedi Atyraý qalalyq komýnaldyq sharýashylyq bóliminiń basshysy Serikbaı Qazıev.

Aımaq basshysy Nurlan Noǵaev qazandyqtar máselesin kelesi jylytý maýsymyna deıin sheshý kerektigin basa aıtyp, qaramaǵyndaǵylarǵa tapsyrma berdi.

"Qazandyqtar máselesin sheshý eń aldymen turǵyndardyń ózderi úshin qajet. Qıyn kezeńderde halyqtyń jylyný úshin qazandyqtardy asyǵys júrip ózderi ornatyp alǵanyn jaqsy túsinemiz. Degenmen, qazir jaǵdaı túzeldi. Qaýipsizdikti tolyqtaı qamtamasyz etýge múmkindik bar. Bul eń aldymen ár adamnyń, ár otbasynyń jeke qaýipsizdigi. Sony halyq túsinýi kerek. BAQ arqyly turǵyndarǵa túsinik jumystaryn júrgizýdi tapsyramyn", - dedi oblys ákimi qaramaǵyndaǵylarǵa.

Esterińizge salalyq, buǵan deıin Úkimet basshysy Baqytjan Saǵyntaev ákimderge jylytý maýsymyn tıisti deńgeıde ótkizýdi tapsyrǵan edi.

Qańtardyń basynda avtomattandyrylǵan jylytý qazandyǵyndaǵy aqaýdyń sebebinen Qaraǵandy oblysyndaǵy Shahan eldi mekeni men Shymkent qalasynda iri apat bolyp, birneshe adam qaza tapty.