Prıdnestrovtan kelgen bosqynnyń uly orystardan qorqatyn ıspandyq mekteptegi muǵalimderdiń qurbanyna aınaldy. Balanyń ata-anasy buǵan kámil senimdi bolyp otyr, dep habarlaıdy life.ru, málimettiń qazaqsha nusqasyn «Qamshy» portaly oqyrman nazaryna usynady.

Aıqaı-shý Marbella qalasyndaǵy Valdeoletta mektebinde bolǵan. Marıa Angeles atty muǵalim bosqyndardyń biriniń ulyn orys dep oılap sabap tastaǵan.

Soqqyǵa ushyraǵan birinshi synyp oqýshysy Charlz Býtanyń ata-anasy Prıdnestrovtyń týmalary. Solarmen birge bala Ispanıaǵa erte kóship kelgen, sol sebepti de ıspan tilin ana tilindeı jetik meńgergen, al orys tilin múldem bilmeıdi eken. Alaıda, mektepte bul balany orystyń dál ózi dep oılaǵan. Anasynyń aıtýynsha, kıkiljińder óte kóp bolatyn, al birneshe kún buryn balsynyń betinen soqqynyń izin baıqaǵan.

– Men balamdy mektepten únemi ózim alyp qaıtamyn. Bir kúni barsam balamnyń beti isip ketken, - deıdi Natalá Rýdenko. – Balanyń mazasy joq, meni ıtermelep, mektepten tezirek ketip qalýymyzdy ótindi, biraq men munyń mán-jaıyn bileıin dedim. Muǵalimnen ne bolǵanyn surasam, maǵan «Bilmeımin, balańnan sura» dep jaýap berdi.

Keıinnen Natalányń uly mektepke eriksiz baryp, ishteı tynyp júrgen. Tipti, dalaǵa da kóp shyqpaýǵa tyrysatyn.Ata-anasy balalarynyń bireýden qorqyp júrgenin baıqap, synyptastarymen ursysyp qaldy dep túıgen. Balalarynyń muǵalimnen taıaq jeýi múmkin degendi múldem oılamaǵan da.

Ne bolǵanyn bala anasyna birneshe aı ótkennen soń aıtyp bergen. Natalá  muǵalimdi «Balaǵa zorlyq kórsetti» degen aıyppen jaýapqa tartýyn talap etip polısıaǵa aryz jazǵan.

Sonymen qatar Charlzdyń anasy advokatpen birge mektep dırektorymen sóılesýge barǵan, al olar kinálaryn moıyndamaı, jaltara bastapty. Degenmen, mektep qyzmetkerleri Natalányń ulynda eshqandaı da orystyń qany joq, bala moldova ultynan ekenine tańqalǵandaryn jasyrmaǵan.

– Búgin menimen birge tilmash boldy. Sol balanyń eshqandaı da orys emestigin bilesizder me dep suraǵan. Onyń ulty bólek jáne ol eshqashan da oryssha sóılep kórgen emes degeninde mektep qyzmetkerleriniń júzinen úlken tańdanys baıqaldy, - deıdi Natalá.

Marıa Angeles muǵalimdi qyzmetinen bosatpaıynsha búldirshin Charlzdy mektepke psıhologıalyq qyzmet kórsetetin maman alyp baryp júredi. Natalányń ózin balasyna qatty ýaıymdaǵandyqtan júrek aýrýyna qatysty aýrýhanaǵa jatqyzypty.

Ispandyq Valdeolotta Laıfý mektebiniń basshylyǵymen tildesý múmkin bolmapty.

Aýdarǵan: Nazerke Labıhan