Nurlan Noǵaev halyqpen túsinise almaıtyn basshylardy aıyptaıtynyn aıtty. Bul týraly Qyzylqoǵa aýdanynda ótkizgen kóshpeli keńesinde belgili boldy.
Jıynda oblystaǵy veterınarıa, aýyl sharýashylyǵy salasynyń hal jaǵdaıy talqylanǵan.
Nurlan Noǵaev 2016 jyly kelgende jergilikti ákimge bergen 22 tapsyrmasynyń qalaı oryndalǵanyn da surady. Aýdan ákiminiń aıtýynsha, tapsyrmalardyń 10-y oryndalyp, 8-i oryndalyp jatyr, qalǵandary sheshimin tapppaǵan.
Keńeste aımaqtaǵy aýylsharýashylyq salasynyń jaǵdaıy týraly sáıkes basqarmanyń basshysy Syrym Rysqalıev baıandady.
Onyń aıtýynsha, oblystyń bul saladaǵy damý deńgeıi jaqsy. Aımaqtaǵy aýylsharýashylyq ónimderiniń kólemi artqan. Bul kórsetkish aldyńǵy jylǵydan 4 paıyzǵa kóbeıip 61 mıllıardqa jetip otyr. Onyń ishinde mal sharýashylyǵy ónimderi 2 paıyzǵa, egin sharýashylyǵy ónimderi 6 paıyzǵa joǵarylaǵan.
Agroónerkásip keshenin sýbsıdıalaý úshin 2,7 mıllıard teńge bólingeni de belgili boldy. Sonyń arqasynda oblysta, máselen, qoı men eshkiniń sany 6000 basqa artyp, 538 myńǵa jetkeni aıtyldy. Bul kórsetkish aldyńǵy jylǵy kórsetkishten 1 jarym paıyzǵa artyq.
Al “Altyn asyq” baǵdarlamasy aıasynda oblys halqy 5 myńǵa jýyq qoı satyp alyp, aımaq jospardy 30 paıyzǵa artyq oryndap otyr. Áıte de, bul kórsetkish jospardy 2 eseden artyq oryndaǵan Jylyoı, Qurmanǵazy aýdandaryndaǵy jumystyń sebebinen ósken. Al keńes ótip otyrǵan Qyzylqoǵa aýdanynyń bul baǵdarlama josparyn tıisti deńgeıge oryndaı almaǵany belgili boldy. Aýdan sharýalary 2016 jyly 1000 bas qoı alýy kerek bolǵan, alaıda jergilikti basshylyq bul tapsyrmanyń údesinen shyǵa almaı, jospardyń jartysyn da oryndamaǵan.
Aımaq basshysy Nurlan Noǵaev bul kemshilik úshin jergilikti basshy Maqsot Muqanovty synnyń astyna aldy.
“Aımaqta aýylsharýashylyq qarqyndy damyp kele jatyr. Mal sany da, odan óndirilgen ónimderdiń kólemi de jyldan jylǵa artyp otyr. Biraq buǵan úles qosyp, sebepker bolyp otyrǵan aýdandar sanaýly. Keıbiri jetistikke ortaqtasyp qana júr. Tapsyrma ár aýdannyń ereksheligine saı birine kóbirek, birine azyraq beriledi. Sondyqtan, myna aýdannyń jaǵdaıy bizden góri jaqsyraq degen syltaý bul jerde júrmeıdi”, - dedi aımaq basshysy.
Oblys ákimi, bul jaǵdaıǵa sebep bolyp otyrǵan negizgi faktor retinde turǵyndardyń memleket jasap jatqan kómekten beıhabarlyǵy dedi.
“Halyq baǵdarlamalardyń kóbinen habarsyz. Bilmeıdi. Ákimdikter bul baǵyttaǵy jumysty údetýi kerek. Ár kásipkerdiń sońynan júgirip, manyna ekshi, anany ósirshi dep jalynyp júrmeı, jalpy túsindirý kerek. Eger halyq “Altyn asyq”, “Sybaǵa”, “Qulan” sekildi baǵdarlamalardyń baıybyna baryp, artyqshylyǵyn sezinetin bolsa, ózderi sońdaryńyzdan qalmaı, sýbsıdıa surap júgirip júredi”, - dedi aımaq basshysy.
Aıta ketelik, byltyr Qyzylqoǵa aýdanyndaǵy “Jasqaırat” kompanıasynda sýyqtan 635 qozy ólgen edi. Oblys ákimi buǵan jergilikti ákimdiktiń, veterınarıa basqarmasynyń jumysyndaǵy álsizdikter sebep ekenin aıtty.
