Bıyl Alash ulttyq avtonomıasynyń qurylǵanyna 100 jyl toldy. Qazaqstan musylmandary dinı basqarmasy janyndaǵy Ǵulamalar Keńesiniń XV májilisinde Alashorda úkimetiniń 100 jyldyǵyna oraı respýblıkalyq ǵylymı-tájirıbelik konferensıa ótkizý týraly usynys biraýyzdan maquldandy dep habarlaıdy QMBD baspasóz qyzmeti.

«Rasynda, qazaqtyń tarıhy taǵylymǵa toly. Musylmandyqty murat etken keshegi Alash qaıratkerleriniń el ishindegi saýatsyzdyqpen aıanbaı kúresip, aǵartýshylyqpen aınalysýy – ótken ǵasyrdyń ólmes ónegesi, esten ketpes erligi dep aıtar edik. Olar bilimsizdiń kúni qarań ekenin jete túsindi. Ózderi bir emes, birneshe salany meńgerdi, birneshe pánderdi ıgerdi. Olardyń bilim jolyndaǵy jigeri, halyqty saýattandyrýdaǵy eńbegi, aýyr synaqtarǵa tótep bergen tabandylyǵy – árbir azamat úshin úlken úlgi», – dep atap ótti májiliste Bas múftı Erjan qajy Malǵajyuly.

Ǵylymı konferensıada Alash qaıratkerleriniń ómir joly, eńbekteri, týyndylary týraly baıandama jasalyp, ony kitap etip shyǵarý josparlandy.