"Velıkaıa stena" qytaılyq munaı kompanıasy 2016 jyly 499 adamdy qysqartqan. Ol ortasha jalaqy men áleýmettik tólemder somasyn da azaıtqan bolyp shyqty. Aqtóbe oblysynyń ákimi Berdibek Saparbaev mundaı kásiporyndy jabý kerektigin aıtty dep habarlaıdy "diapazon.kz".
"Barlyq jerde jalaqy ósip jatyr, al sizderde qysqartý júrip jatyr. Barlyq kásiporyn áleýmettik mindetterin oryndaıdy, al sizder oryndamaısyzdar. Onda kompanıany jabý kerek. Bizge mundaı kompanıanyń qajeti joq. "Velıkaıa stenanyń" isinen basqa isimiz joq pa? Qalǵan 900 qyzmetkerdi jumysqa turǵyzamyz. Ol qıyn emes, al kompanıany zań aıasynda jaýyp tastaı alamyz" dedi óńir basshysy Berdibek Saparbaev.
2016 jyly jumys kóleminiń az, al shyǵyn 1 mıllıard 600 mıllıon teńgege jetkenin aıtyp aqtaldy kompanıa basshysy Chjan Szún.
Alaıda Saparbaev "Velıkaıa stenanyń" quryltaıshylardan 100 mıllıon dollar alǵanyn, bul qarajattyń kásiporynnyń barlyq kerek-jaraǵyna jetip-artylatynyn aıtty. Bas dırektor bul qarajattyń 24 mıllıon dollary bankke qaıtarylǵanyn, qalǵan bóliginiń Qytaıda satyp alǵan materıaldyń tólemi ekenin túsindirdi.
"Adamdardyń 60 paıyzyn qysqartsańyzdar, qytaı qyzmetkerlerdiń de 60 paıyzyn qysqartyńyzdar. Qysqartý bolǵanda, eń aldymen qytaı mamandaryn, basqa sheteldikterdi qysqartyńyz. Ekinshiden, 3-shi jáne 4-shi kategorıadaǵy qytaı qyzmetkerlerin jumysqa alýdyń qajeti joq, Qytaıdan keletin mamandar 1-shi jáne 2-shi sanattaǵy bolýy kerek" - dedi oblys ákimi.
"Kompanıadaǵy jumysshylardyń sany - 900, onyń 66-y qytaılyq. Iaǵnı 7 paıyzdy quraıdy. Biz 3-shi jáne 4-shi kategorıadaǵy qytaı mamandaryn nege alamyz? Sebebi barlyq qural-jabdyǵymyz Qytaıdan, olar isten shyqqanda, aqaýdy joıýǵa qytaı mamandarynyń múmkindikteri kóbirek" - dedi Chjan Szún.
Saparbaevtyń "Mundaı mamandar Qazaqstanda joq pa?" degen suraǵyna qytaı kompanıasynyń basshysy "Biz sizderdiń mamandardy oqytyp keldik" dep jaýap berdi.
"Oqytsańyzdar, olar qaıda? Jumysqa tartpasaq, ne úshin oqyttyńyzlar - dep suraǵan ákim keıingi sózin óz qolastyndaǵylarǵa qazaq tilinde jalǵady. - Bular bizdiń mamandardy oqyttyq deı me? Olar qaıda? Qaıda qarap júrsizder? Endeshe bylaı, 3-shi jáne 4-shi kategorıadaǵy qytaı mamandaryna ruqsat bermeńizder! Budan eshteńe shyqpasa, vızany da bermeımiz" dep kesip aıtty Berdibek Saparbaev.
Osydan keıin qytaı kompanıasynyń basshysynan qysqartýǵa ushyraǵan qansha qyzmetkerdiń "Velıkaıa stenaǵa" oralatyny jaıly suraldy.
Chjan Szún ýaqyt berýdi surady. "Aqpanda eki burǵylaýdy ashamyz, ıaǵnı 114 adam jumysqa oralady. 2017 jyly jumys kólemi maksımaldyq deńgeıge jetkende, jumysqa 800 adam tartylady. Qazir 600 adam jumys isteıdi. Barlyq qyzmetkerdi qaıtaramyz dep ýáde bere almaımyn, biraq sizden ýaqyberýińizdi suraımyz"- dedi ol.
Saparbaev aqtóbelik bıliktiń baılanysy jaqsy ekenin, sondyqtan "Velıkaıa stena" basqa óńirlermen jumys isteı bastasa, Chjan Szúnge qoldaý kórsetýge ýáde etti. Naqtyraq aıtqanda, Atyraý, Mańǵystaý jáne Batys Qazaqstan oblystary, sondaı-aq, Reseı óńirleri. Alaıda ákim kompanıany jabý máselesin qaıta kóterdi.
"Quryltaıshylarǵa hat joldaý kerek. Kásiporynnyń ekonomıkalyq jaǵdaıyn jaqsartpasa, quzyrly organnyń kómegimen bankrottyqqa deıin barý úshin shara qoldanamyz. Bizge máselesi shash etekten kompanıanyń qajeti joq. Aqtóbe oblysynyń ekonomıkasy bul kompanıaǵa táýeldi emes. Qazir 900 adamnyń 422-si bul kompanıada jumys istemeıdi. Qalǵan 500 adamǵa jumys taýyp bere alamyz" dedi Berdikbek Saparbaev.
