Germanıa bıligi bosqyndardyń otanyna qaıtý úshin €1200 tóleıdi dep habarlaıdy izvestia.ru. Osylaısha bosqyndardy úıine qaıtýǵa úgittemek.

Gemanıanyń İİM «Bastapqy kómek plús» atty jańa baǵdarlamasyn jasady. Ony qarjylandyrý úshin  €40 mln. bólindi.

Baǵdarlama 2017 jyldyń 1 aqpanynan bastap iske qosyldy. Ol boıynsha 45 eldiń mıgranttary qamtylady. Baǵdarlamanyń negizi – bosqyndardyń óz erkimen otanyna oralýy.

Qarjylyq kómek 12 jastan joǵary azamattarǵa qarastyrylǵan. Qarjy aýdarý eki kezeńnen turady. Alǵashqysyn Germanıadan ketip bara jatqanda, qalǵan bóligin otanynda 6 aı turǵannan keıin beredi.

Mıgrasıalyq saıasat sarapshysy Katarına Enders atalmysh baǵdarlamanyń kúmándi tustary kóp ekenin aıtady.

«Bosqyndardyń óz úıin, otanyn tastap kelýiniń sebebin eskerý kerek. Bul kedeıshilik, ertengi kúnge senimsizdik, soǵys pen shekteýler. Bir retti tólem, olardyń otanynan oralǵannan keıingi máselelerin sheshe almaıdy. Kóptegen bosqyndar Eýropa eline kelý úshin deldaldarǵa kóp aqsha berdi. Sondyqtan nemis bıligi olardy qabyldaýǵa qarsy bolǵan jaǵdaıda, olar basqa elden pana izdeıdi» dedi Katarına Enders.

Sarapshynyń aıtýynsha Germanıa kansleri Angela Merkel saılaýshylardyń qoldaýyna ıe bola almaı otyr. Atalmysh baǵdarlamany engizý arqyly kóshbasshy deńgeıinde qalyp qoıýdy kózdeıdi.

«Kóptegen turǵyndar bosqyndardyń tolassyz kelip jatqanyna alańdap otyr. Bul jaǵdaı «oń partıasynyń» ataǵyn asqaqtatty. Angela Merkeldiń basshylyǵyndaǵy basqarýshy partıa saılaý aldynda ózine upaı jınaýǵa talpynyp júr» dep atap ótti Enders.

Alaıda bul sharalar da máseleni sheshe almaıdy. Germanıa turǵyndarynyń oıynsha kansler Angela Merkel elde mıgrasıalyq daǵdarys ornaǵanyna jaýapty.

«Bastapqy kezde nemis bıligi bosqyndardy óz eline shaqyrdy. Endi qarjylyq kómek arqyly olardan qutylýdy oılap otyr. Bosqyndar kóbine soǵys, terorızm, ashtyq  ornaǵan elderden kelgenin eskerý kerek» dep óz oıymen bólisti Berlın turǵyny Anna.