«Qazaqstan» telearnasy 2017 jylǵy 24 aqpan kúni qazaqstandyqtardyń kóńilinen shyqqan «Kelin» hıkaıasynyń kórsetilimin aıaqtaıdy», - dep habarlady telearna saıty.
«Kishkentaı Anandıdiń ómirinen syr shertken hıkaıa bes jyldyń ishinde bizdiń kórermenderimizdiń nazarynan tys qalǵan joq. Telekórermender jergilikti salt pen dástúrge sáıkes turmysqa erte shyqqan jáne bóten otbasyǵa kelin bolǵan kishkentaı qyzdyń taǵdyryna beıjaı qaraı almady. Óziniń eńbekqorlyǵynyń, tózimdiliginiń jáne úlkenderge degen qurmetiniń arqasynda Anandı qaıyn jurtyna tez sińip ketedi. Bul qasıetteriniń arqasynda qazaq kórermenderiniń de kóńilinen shyǵady», - dep jazylǵan málimdemede.
Basqasyn qaıdam, «Kelin» telehıkaıasy sońǵy bes jyldyń ishinde reıtıńi joǵary telenovellalardyń qatarynda bolypty.
«Osy jyldardyń ishinde hıkaıada bas rólderdi somdaǵan akterlar da birneshe ret aýysty. Bala kezdegi jáne boıjetken Anandıdiń rolin úsh aktrısa: Avıka Gor, Pratúsha Banerdjı jáne Torad Raspýtra somdady.
2014 jyly Astanaǵa Avıka Gor, al 2015 jyly Anandıdiń jubaıynyń rólin somdaǵan Sıddharth Shýkla (Shıva) kelgen bolatyn. Árbir kezdesýge myńdaǵan jankúıerler qatysty.
«Qazaqstan» telearnasy «Kelin» hıkaıasynyń kórsetilimin aıaqtaı otyryp, kórermenderine budan da qyzyqty telehıkaıalardyń kórsetilimin usynatyn bolady», - dep aıaqtalǵan telearna taratqan habar.
Esimizde, telehıkaıa alǵash bastalǵanda kámeletke jańa tolǵan qyz Anandı bilimnen maqurym qalyp, áldebir otbasynyń kelini bolyp kete barǵan. Qatal áje, qarańǵy otbasy, erketotaı kúıeýmen kishkene qyzdyń aıqasy basynda qyzyq kóringen. Alaıda, fılm sozylyp ketti, sozylǵanda uzaǵynan uzaq sozyldy. Bolmashy oqıǵany dabyraıtyp, qulaqqa óte turpaıy mýzykalaryn dańǵyrlatyp qazaqtyń «mıyn 5 jyl» ashytty.
Anandıdiń rolin somdaǵan qyz Qazaqstanǵa kelip, osy telehıkaıany taratatyn arnadaǵy «Túngi stýdıadaǵa» qonaq bolǵanda qazaqtyń áldebir qatyndary olardyń bas aıaǵyna sólkebaı men altyn júzigin asyp kúıdirip edi-aý.
«Kelin» telehıkaıasy basqasyn qoıǵanda qazaq áıelderiniń qanshama altyn ýaqytyn urlady. Ár bólimine ketken ýaqytyn áıelderimiz basqa iske arnasa álbette nátıje basqa bolar edi.
«Basqa da qyzyqty telehıkaıalar» dep qoıyp on jyl boıy bitpeıtin odan da soraqy telehıkaıany kórsetpese ıgi. Osy telehıkaıanyń ár bólimin aýdaryp, dýbláj jasaýǵa ketken aqshaǵa qazaqtyń aýyldarynan bir balany 11 jyl oqytýǵa aqsha bólýge bolar edi. Bes jylda úsh myńnan astam balaǵa qamqorlyq jasaýǵa bolar edi. Jaqsy mektep salýǵa bolar edi. Olaı bolmady.
Dál qazirgi kúni basshysy joq telearnaǵa aıtar ýájim endigári «mı ashytatyn» shettiń dúnıesin aýdarýmen emes, «mı sergitip» sanany oıatatyndaı óz ónimderimizdi daıyndasa jaqsy bolar edi.
Aqan Bektas
