Prezıdenttiń jarlyǵymen Konstıtýsıaǵa ózgeris engizý týraly búkilhalyqtyq talqylaý qyzý júrip jatyr. Jer týraly 26 baptaǵy ózgeriske halyqtyń qalaı qarsy bolyp jatqanyn azamattardyń arynynan, áleýmettik jelidegi pikir talastan, taksısterdiń áńgimesinen bilip jatyrmyz.
Halyq Konstıtýsıadaǵy ózgeris týraly zań jobasynan tys, óz usynystaryn da aıta bastady. Solardyń qataryndaǵy keshe ǵana sizderdiń «Qamshy» saıttaryńyzda jarıalanǵan eki usynysty men de qoldaımyn. Konstıtýsıadaǵy til týraly baptyń ekinshi tarmaǵyna eki bastan qarsy edim. Al, shetten oralǵan qazaqtarǵa azamattyq berýdi Atazańmen bekitýdi qos qoldap quptaımyn!
«Elbasy bastap ketken uly kósh kelesi prezıdentterdiń tusynda da jalǵasyn tabýy úshin myzǵymas Konstıtýsıanyń ekinshi bólimindegi 10-ynshy bapqa «myzǵymas Konstıtýsıanyń ekinshi bólimindegi 10-ynshy bapqa «Respýblıka sheginen tys jerlerde turatyn etnıkalyq qazaqtar Qazaqstan Respýblıkasyna kedergizsiz oralady jáne turý merzimine qaramastan, Qazaqstan Respýblıkasynyń azamattyǵyn jeńildetilgen tártippen (tirkeý tártibimen) alady» degen tarmaq qosýdy suraımyz.» degen tarmaqsha qosýdy suraımyz», - dep jazǵan ekensizder. Bul bastamany qoldaýshylardyń sany kóptigi baıqaldy. Sizderdiń bastamalaryńyzdan shabyt alyp, áleýmettik jelide aty bar tulǵalar, oqylymy kóp saıttar da osy máseleni qaýzapty.
Shyndyǵynda da oralmandardy elge shaqyryp, olarǵa Atajurttyń tórin usyný prezıdenttiń altyn árippen jazylatyn eńbegi. Prezıdent Nazarbaev «Shet elderde júrgen aǵaıyndy elge oraltyp qýantý – tarıhı ádilettilikti qalpyna keltirý bolatyn», - degen eken.
Qazaqtar álemge baılyq qýyp, baqyt qýyp shashyraǵan joq. Bas saýǵalap, Reseı ımperıasy men Reseı qurǵan sovet odaǵynyń sýyq saıasatynyń qurbany bolyp, baqytsyzdyqtan shetel asyp ketti. Tarıhtyń osy ádiletsizdigin qalpyna keltirý – rasymen de Elabsy Nursultan Ábishulynyń altyn árippen jazylatyn tarıhı eńbegi.
Erteń elge basshy bolyp kelgen kelesi prezıdent bul saıasatty qalaı jalǵaıdy, sheteldegi qazaqtar máselesine Tuńǵysh prezıdent Nursultan Nazarbaev sıaqty mán berip, mańyz berip qaraı ma? Ol jaǵy belgisiz. Eń mańyzdysy qazir álemdegi 5 mıllıon qazaqtyń jahandaný prosesine jutylyp bara jatqany. Óte-móte jalǵyz ǵana qazaq mektebi Qosaǵashpen Reseıdegi mıllıonǵa jýyq qandasymyzdyń taǵdyry qalaı bolmaq? Mıllıardtar arasyndaǵy mıllıon jarym qandasymyzdyń erteńi ne bolmaq? Qytaıda qazaq mektepteri túgelge jýyq jabylyp bitti. Qujattaryna amalsyz ózbek dep jazdyryp júrgen ońtústik kórshimizdegi qandastarymyz neniń kúıin keshpek? Azamattyq alý týraly Atazańda bap jazylsa, Kóshi-qon zańy bir silkinip, Kósh shetelde eshbir qazaq qalmaǵanǵa deıin jalǵasar edi dep oılaımyn.
Tipti, maqalaǵa jazylǵan pikirler arasynda «shetelden kelgen aǵaıyn shekaradan attasymen birden azamattyq berilsin» dep jazylypty. Bul, halyqtyń da sheteldegi aǵaıynǵa, alystaǵy qandastarǵa yqylasynyń keń, qushaǵynyń ashyq ekenin kórsetse kerek. Bastamalaryńyzdy qoldaı otyryp, ózim óleńin súıip oqıtyn Talǵat aqyn Eshenulynyń mynaý eki shýmaq óleńimen hatymdy aıaqtaımyn:
Áýelden-aq taǵdyrymyz alaǵaı da bulaǵaı,
Sen eshkimge qaramaı,
Eshteńege qaramaı,
Kóshiń túze!
Buqarańdy basta, kel.
Azappen kel, tozaqpen kel,
Qash ta kel,
Urym-Qyrym as ta kel.
Kóshiń túze!
Kútpese de ulyǵy,
Kózi tórt bop tosqan el.
Kórsek – birge,
Týǵan eldiń toıynda
Bostandyqtyń shárbat dámin tataıyq.
Ólsek – birge,
Týǵan jerdiń saıynda
qushaǵymyz ajyramaı jataıyq!
Muqaǵalı Sarybaev,
Ońtústik Qazaqstan oblysy, Qazyǵurttan.
