Sársenbi kúni «Mega Aqtóbe» kınoparkinde jas rejıserlar Názıa Nazarbek pen Meıirim Arǵynbaeva túsirgen «Men seni súıemin, Aqerke!» kórkem fılminiń premerasy ótti dep jazady aktobegazeti.kz.
Jańa kınokartınanyń senarıine Astana qalasyndaǵy Óner ýnıversıtetine oqýǵa túsken stýdent qyzdyń aýyr dertke shaldyǵyp, onyń saýyǵyp ketýi úshin dostarynyń qalaı kómektesýge tyrysqany týraly shynaıy ómirden alynǵan oqıǵa arqaý bolǵan.
Fılmge basty keıipker bolyp alynǵan Aqerke Jurymbaeva 1993 jyly Aqtóbeniń Áıteke bı aýdanynda dúnıege kelgen. Jastaıynan ónerge jany qumar daryndy jas kóptegen án baıqaýlaryna qatysyp, júldeger atandy. Mektepti úzdik aıaqtap, Astanadaǵy Óner ýnıversıtetine oqýǵa tústi. Aqerkeni biletinder stýdenttik shaǵy bastalǵannan-aq kóptegen úlken sahnalarda, Qalqaman Sarınniń jyr keshinde óner kórsetkeninen habardar. Alaıda, juldyzy jarqyraı janyp kele jatqan jas qyzǵa kenetten qan ragy dıagnozy qoıylyp, shetelde ota jasaý úshin qomaqty qarajat talap etilgen.
Fılmniń rejıseri Názıa Nazarbektiń aıtýynsha, qurbysynyń syrqatyn bilgennen keıin búkil ýnıversıtet bolyp jumylyp, jastar ony emdetýge aqsha jınaýǵa kirisken. Stýdentter Astananyń iri saýda ortalyqtarynda qaıyrymdylyq konsertterin qoıyp, donor bolýǵa qan tapsyryp, barynsha qol ushyn berýge tyrysqan. Kóp uzamaı Aqerkege Túrkıada ota jasaýǵa kezekten tys kvota berilip, ota sátti aıaqtalady. Ókinishke qaraı, aýrý boıyn meńdep alǵan boıjetken 20 jasqa tolar-tolmas shaǵynda 2013 jyly kóz jumady.
— Oqıǵanyń negizgi jelisin esh ózgerissiz qaldyrdyq. Aqerke ómirden ótkennen keıin úsh aıdan soń fılm túsirýdi qolǵa aldyq. Ózimiz Óner ýnıversıtetin bitirdik. Men rejıserlyq mamandyqta bilim aldym. Senarıin de ózim jazyp shyqtym. Fılmdi túsirý úshin arnaıy demeýshiler men kásipkerlerdi izdestire bastadyq. Ókinishke qaraı, qoldaý bildiretin adamdar taba almadyq. Nesıe alyp, azyn-aýlaq aqshamen 2015 jyly óz kúshimizben túsiremiz dep uıǵardyq. Sondaı-aq qarjyny jınaýǵa Aqerkeniń ata-anasy men týysqandary, dostary kómektesti. Aqerkeniń eń sońǵy kúnine deıin janynan tabylyp, qoldaý kórsetken Azamat esimdi súıgeni boldy. Ol oǵan aýrýmen kúresýine septigin tıgizdi. Fılmde osy shynaıy sezimge degen adaldyq, ómirge degen qushtarlyq sýretteledi, — deıdi Názıa.
Búginde Azamat ta mýzykalyq mamandyqty bitirgen. «Túngi stýdıa» baǵdarlamasyndaǵy mýzykalyq topta óner kórsetedi eken.
— Ásirese, qarajat jaǵynan qıyndyqtar boldy. Kúndelikti túsirilimge aqsha qosyp otyrdyq. Fılmdi budan da jaqsy deńgeıde alyp shyǵýǵa bolatyn edi. Alaıda, bizge kıno aparatýralar jetispedi.
Búgin fılmniń premerasyn Aqerkeniń týǵan jerinde eń birinshi ata-anasy men týystary kórsin dep sheshtik. 2 aqpannan bastap, Qazaqstannyń barlyq qalalarynda kórsetilimge shyǵady, — deıdi kınotýyndynyń avtory.
Fılmde Aqerkeniń qurbysynyń rólin Názıanyń ózi oınaıdy. Ári ol da aqtóbelik jerlesimiz eken. Basqa da akterler onyń shynaıy janashyr dostary, birge oqyǵan kýrstastary. Tek bas keıipkerler Aqerke men Azamattyń rólindegi Aısánim Qasteeva men Nurlan Naýryzbaev kastıng arqyly tańdalyp alynǵan.
Premeraǵa kelgen zal toly kórermenniń kózine jas úıirilip, jastardyń ónerine zor rızashylyǵyn bildirdi. Fılmde eshqandaı ásireleý joq. Qarapaıym stýdentterdiń jataqhanadaǵy ómiri men aýrýhanadaǵy oryn alǵan oqıǵalary sol qalpynda berilgen.
— Fılm óte unady. Keıipkerdiń meniń qyzymmen uqsastyqtary óte kóp eken. Aqerke balabaqshaǵa barǵan sátinen bastap án aıtyp, bı bıledi. Mektepte qandaı da bir is-shara bolsa, sonda júretin. Qyzymnyń barlyq adal júrekti dos-qurbylaryna zor rızashylyǵymdy bildiremin. Elimizde osyndaı jastardyń baryna qýanamyn, — dedi Aqerkeniń anasy Bıbinur Bekenbaeva.
Biz fılmniń sońynda premeraǵa qatysqan bas keıipkerlerdi de áńgimege tarttyq.
— Kastıngke kezdeısoq tústim. Aqerkeniń rólin somdaý barysynda qıyndyqtar týǵany ras. Obrazdy shynaıy oryndap shyǵý úshin, júregińmen sený kerek. Barynsha qoıylǵan talaptardy oryndaýǵa tyrystym. Negizinen dızaınerlik mamandyqty bitirdim. Búginde Óner ýnıversıtetinde sýretshi mamandyǵynda oqyp jatyrmyn, — deıdi Aısánim Qasteeva. Aıpaqshy, Aısánim qazaqtyń áıgili sýretshisi, beıneleý óneriniń negizin salýshylardyń biri Ábilhan Qasteevtiń shóberesi ekenin de bildik.
Al Azamattyń rólindegi Nurlannyń mamandyǵy arhıtektor. Ekeýiniń de kınodaǵy alǵashqy qadamy. Kastıngte kezdesip júrip, birin-biri unatqan ǵashyqtar búginde otbasyn qurǵan erli-zaıyptylar eken. Bir jasar uldary bar.
Fılmnen túsken qarajat qaterli dertke shaldyqqan jandardyń emi úshin usynylmaq.
Aqbota QALDYBEK
