Vladımır Pýtınniń baspasóz hatshysy Dmıtrıı Peskov Reseı Qyrymdy qaıtarý týraly máseleni AQSH-pen talqylamaıtynyn málimdedi dep habarlaıda bbc.com. Osylaısha ol Aq úıdiń baspasóz hatshysy Shon Spaıserdiń Donald Tramp Qyrymdy Ýkraınaǵa qaıtarýdy kútip otyr degen málimdemesine jaýap berdi.

Kúndelikti ótetin brıfıńte jýrnalıser Peskovtan Spaıserdiń sózderine qatysty pikir bildirip, Reseı prezıdenti Vladımır Pýtınmen AQSH prezıdenti sóıleskende Qyrym máselesi aıtyldy ma dep suraq joldady.

«Joq, kótermedi. Biz AQSH-pen baılanysty ornata alamyz dep úmittenemiz. İskerlik turǵysynan amerıkandyq seriktesterge óz pozısıamyzda jetkizetin múmkindik týady dep oılaımyn» dep jaýap berdi Peskov.

Buǵan deıin Aq úıdiń málimdemesine qatysty Reseıdiń SİM óz pikirin bildirgen.

«Biz óz terıtorıamyzdy qaıtarmaımyz. Qyrym Reseı Federasıasynyń jeri» dedi Marıa Zaharova.

Reseı Qyrymdy 2014 jyldyń kókteminde basyp alǵan. Kıev jáne halyqaralyq uıymdar Qyrymdy Ýkraınanyń jeri dep esepteıdi. AQSH jáne Eýropa elderi Reseıge Qyrymǵa basqynshylyq áreket jasaǵany úshin jáne Ýkraınanyń shyǵysyndaǵy áskerı shabýyldardy Reseı jasady dep aıyp taǵyp, sanksıalar salǵan.