Jol polısıasynyń qolynda endi POS-termınal bolady. Bank kartasy bar júrgizýshi jol erejesin buzǵany úshin aıyppuldy dál sol jerde tóleı alady dep habarlaıdy patrul.kz.

POS-termınaldar Almaty oblysynda qoldanyla bastady. Ol dúkennen taýar satyp alǵandaǵy tólem júıesi sekildi. Bank kartasy POS-termınaldyń chıp-rıderine qoıylady, «Ákimshilik aıyppuldardy tóleýdi» tańdaıdy. Somma men hattamanyń nómeri engiziledi. Osydan keıin termınal pin-kodty suraıdy. POS-termınal prosesıngti ortalyqpen baılanysyp, nátıjesin kórsetedi.
 

Apparat eki túbirtekti birden shyǵaryp beredi. Bireýinde júrgizýshi qol qoıyp polısıaǵa beredi, ekinshisi ózinde qalady. Onda «Ákimshilik aıyppulǵa tólem» jáne «Maquldandy» dep jazylyp turady. Ózge adamnyń kartasymen tólem júrgizýge bolmaıdy. Jol erejesin buzǵan adam tek óziniń kartasyn ǵana qoldana alady.