«Sheteldikterdiń Almatyǵa degen kózqarasyn nıgerıalyq Rich D esimdi jigit óz ánine syıdyra bildi», - dep jazdy Baq.kz  Afrıkalyq qonaq qazaq qalasynyń sulýlyǵy jaıynda beıneklıp túsirip, áýeletip án de salǵan. Tipti arasynda dombyrany da qaǵyp qoıady.

Rich D óziniń Almatyǵa degen mahabbatyn qala tabıǵatynyń ásemdigimen, halqynyń qonaqjaılyǵymen túsindirgen eken. Jastaıynan óleń aıtyp, ánshilikti kásip etken jigit alǵashynda Nıgerıadaǵy shirkeýde án aıtypty. Keıin Qazaqstanǵa oqýǵa kelip, túngi klýbtarda DJ qyzmetin atqarǵan, ári óziniń jańa óleńderin jaza bastapty. Arasynda birneshe jylǵa AQSH-qa ketken ol saz mektebinde biliktiligin jetildirgen. Bıyl Almatyǵa qaıta oralǵan ánshi shyǵarmashylyǵyn osynda jalǵastyrýdy jón kóripti. Rich D  búginde 10 ánniń avtory. Óleńderin ol aǵylshyn, orys jáne qazaq tilderinde jazady eken. Aǵylshyn men orys tilderin erkin meńgergen afrıkalyq jigit qazir qazaqshany da tyńǵylyqty úırenýge bel býypty. Qazaq elin ózge elden kelgenderdiń ánge qosýy Qazaqstannyń shetelge tanyla berýi úshin jaqsy nasıhat. Nıgerıalyq jigitke Qazaq eline arnaǵan ánder qatary molaıa bersin dep tilek bildiremiz.