Budan 16 jyl buryn, naqtyraq aıtsam,   1996 jyly qulja qalasynda ýnıversıtette oqyp júrgen kezimde,«Nurtaı qajy » atanǵan uıǵyr kásipker 60 myń dollar qarjy shyǵaryp, «Nurtaı qajy jetimder mektebin» ashqandyǵy  qoǵamda kúshti ańys qozǵaǵan edi. Bul jaqsylyqty  jerlik aqbarat kózderi jarysa jazdy. Sol beıbaq balalardyń barlyǵy Nurtaı qajyny «áke» dep ataıtyndyǵyn birge oqıtyn uıǵyr sabaqtastarymyzdan jıi estıtinbiz. Eýropa úlgisindegi eki qabatty oqytý úıi, eki qabatty jataqhanasy, arnaıy asqanasy men kólemdi sport kesheni bar osyndaı qutty mekendi kórip qaıtýǵa bárimiz qushtar edik. Sonda oılaıtynmyn: «Shirkin, qazaqta da osyndaı mıllıoner kóptep týsa eken» dep.

Qudaıǵa shúkir, Qytaıdaǵy qazaqtarda jetimder máselesi qazirge basty máselege aınalǵan joq. Biraq bar qazaqtyń atajurty Qazaqstanda bul máseleniń ózekti bolyp turǵandyǵyn qulaǵymyz shalady. Erterekte Meırambek Besbaev shyrqaıtyn «Boztorǵaı» áni de talaı jaıtty uǵyndyrǵandaı bolyp edi. Keıde Qazaq elindegi ártrúrli telearnalarda jetimder jaıynda túsirilgen beınebaıandardy kórip  et júregim eziledi.

Atajurtqa baryp kelgen kórshim mynadaı áńgime aıtyp edi: «Ol jaqtaǵy týystarymyz shalqyǵan baı eken. Qarapaıym ǵana bir mysal aıtaıyn, shetelden eki ıt satyp alypty. Olardy arnaıy qarap-baptaıtyn qyzmetkerler bar. Itter jýyndy-shaıyndy ishpeıdi, ádeıi ázirlengen tamaqtary, jýynýyǵa arnalǵan bólmeleri bar. Qyzmetkerler «aıym», «kúnim» dep meıirin tógip, aıaýly balasyndaı mápeleıdi.

–  Sonda bir ıttiń baǵasy qansha turady eken?

– Ony qaıtesiń? Sheteldegi bir qazaq otbasynyń atajurtyna baryp, ornalasyp, shańyraq kóterýine jetetin aqsha...

Ia, Qazaq elinde mıllıoner atanǵan qarakóz aǵa-ápkelerimizdiń kóp ekendigin, tipti keıbiri Halyqaralyq baılardyń qatarynan tabylyp jatqanyn kúndelikti aqparat kózderinen bilip júrmiz. Joǵaryda ataǵan Nurtaı qajy degen uıǵyr azamattyń baılyǵy olardyń baılyǵynyń janynda túkke de tumaýy múmkin. Biraq atqarǵan jumysyn aıtsańyzshy! Soǵan qarap eriksiz oıǵa batasyń: Bizdiń Alashtyń baılary mıllıondap aqsha shyǵaryp, mektep saldyryp, neshe júzdep jetim asyramasa da, silekeıimen aýrý ákeletin ıt asyraǵansha, otbasy meıirne muqtaj jetim balalardy asyrasa.    Ondaı azamatty qudireti kúshti Alla Taǵala saýapqa jazary sózsiz. Óıtkeni, qasıetti Quran kárimde: «Jetimderge jaqsylyq qylyńdar» delingen.

Shalqar Qanıatbekuly, QHR

Sýret: funzoo.ru